बंगळुरूची भिस्त परतून कोहलीचेर

भांगरभूंय | प्रतिनिधी

इंडीयन प्रिमीयर लिगेंत (आयपीएल) आयज रॉयल चॅलेंजर्स बंगळुरू आनी कोलकाता नायट रायडर्स ह्या पंगडां मदीं हांच्या एम चिन्नास्वामी स्टेडियमाचेर जातली. दोनूय पंगडांनी साबार आक्रमक बॅट्समन आसात, ते एका हातान मॅच जिखून दिवपाक शकता, ताका लागून मॅचींत धांवड्यांचो पावस पडपाची शक्यताय आसा.

विराट कोहली आयपीएलांत सगल्यांत चड धांवड्यो करपी बॅट्समन आसा. पूण, भागिदारी करपाची ताची कळाशी, ताका हेर बॅट्समनां परस वेगळो करता. आयपीएलांत कोहलीन 150 परस चड भागिदारी सात खेपे केल्या. 150 धांवड्यांची भागिदारी जावप म्हणल्यार जैताची हमी आसा. 33 खेपे 150 धांवड्यांच्यो भागिदारी जाल्यात आनी हातूंत फकत एकदाच पंगड हारला. हातूंतल्यो चार भागिदारी एब डी विलियर्स आनी कोहली मदी जाल्यात. बंगळुरू पंगडा खेरीत डॅव्हिड वॉर्नरान 150 परस चड भागिदारी चार खेपे केल्यात.

फाटले मॅचींत बंगळुरूचे सुरवातीचे स बॅट्समन उजव्या हातान बॅटींग करपी आशिल्ले. सुयश शर्माक सोडलो जाल्यार कोलकाताच्या बॉलिंग विभागाक उजव्या हातान बॅटींग करप्याक बॉलींग घालपाक आवडटा. सुयशाक सोडलो जाल्यार हेर बॉलरांची इकॉनॉमी उजव्या हातान बॅटींग करपी बॅट्समनां मुखार बरी आसा. आंद्रे रसेल 8.9, मिचेल स्टार्क 7.3, हर्षित राणा 8.4, सुनील नारायण 6.5, वरुण चक्रवर्ती 7.5 अशी इकॉनॉमी आसा.

पयले मॅचींत कोलकातान नारायण आनी फिल सॉल्ट हे जोडयेक डावाची सुरवात करपाक धाडिल्ली. तांणी पयले विकेटी खातीर 23 धांवड्यांची भागिदारी केली. 2022 सावन कोलकाताची ही 15वी ओपनींग जोडी आशिल्ली. आयपीएलाच्या इतिहासांत हेर खंयच्याच पंगडान इतक्यो जोडयो बदलूंक ना. कोलकाताचे एकाय ओपनींग जोडयेक व्हड भागिदारी करूंक ना. ताची ओपनींग करपाची सरासरी 19.3 इतकी आसा. हातूंत फकत तिनूय अर्द शेंकड्यांच्यो भागिदारी जाल्यात.

सॉल सेगीत डावाची सुरवात करता.पूण, नारायण पांच वर्सांनी डावाची सुरवात केल्या. 2017 आनी 2019त ओपनर म्हणून नारायणाचो रॅकॉर्ड उत्कृश्ट आसा. ताणें 33 डावांनी 184चे स्ट्रायक रेटीन धांवड्यो केल्यात.

फाटल्या तीन हंगामांनी नितीश राणान स्वीप आनी रिव्हर्स स्विप वरवीं 173 धांवड्यो केल्यात. अशे शॉर्ट खेळून ताचे परस चड धांवड्यो फकत सुर्यकुमार यादवान केल्यात. ताणें 189 धांवड्यो केल्यात.