भांगरभूंय | प्रतिनिधी
बायलांचे प्रिमियर लिगेंतले 11वे मॅचींत काल येजमान रॉयल चॅलेंजर्स बंगळुरून युपी वॉरियर्साक 23 धांवड्यांनी हारयलो. अंदूंच्या हंगामांतलें रॉयल चॅलेंजर्स बंगळुरूचें हें तिसरें जैत थारलें. बंगळुरूच्या जैतांत मुखेली स्मृती मंधाना आनी अश्टतासांची खेळगडी एलिसे पॅरी पर्जळ्ळीं.
रॉयल चॅलेंजर्स बंगळुरून पयलीं बॅटींग केली. मुखेली स्मृती मंधाना आनी एलिसे पॅरी दोगांयनी अर्द शेंकड्यांची खेळी केली. तांच्या अर्द शेंकड्यां नेटार रॉयल चॅलेंजर्स बंगळुरून निर्धारीत 20 ओव्हरींनी 3 विकेटी वगडावन 198 धांवड्यो केल्यो. मंधानान 50 बॉलांनी धा चवके आनी तीन सक्यांचे मजतीन 80 धांवड्यो केल्यो, जाल्यार एलिसे पॅरीन 37 बॉलांनी चार चवके आनी चार सक्यांचे मजतीन 58 धांवड्यांची खेळी केली. मंधाना आनी पॅरी दोगांयनी दुसरे विकेटी खातीर 64 बॉलांनी 95 धांवड्यांची भागिदारी केली.
ते पयलीं मंधानान मेघना वांगडा मेळून 5.3 ओव्हरींनी 51 धांवड्यांची भागिदारी करून पंगडाक बरी सुरवात करून दिल्ली. बंगळुरून पावर प्लेंत 57 धांवड्यो केल्यो.
मोखीचो फाटलाव करपी युपी वॉरियर्सान बरी बॅटींग केली. पूण, अखेरेक ताका 23 धांवड्यो उण्यो पडल्यो. हिली आनी किरण नवगिरे हांणी बरी सुरवात करून दिली. दोगांयनी पयले विकेटी खातीर 4.2 ओव्हरींनी 47 धांवड्यांची भागिदारी केली. पूण, सोफी डिव्हायनच्या एका उत्कृश्ट बॉलाचेर नवगिरे 11 बॉलांनी 18 धांवड्यो करून बाद जाली. चमारी अटापट्टू परतून एकदा अपेशी थारली. ते उपरांत चवथे सुवातेर बॅटिंगेक आयिल्ले ग्रेस हॅरिस पांच धांवड्यो करून तंबूंत परतली. ते उपरांत पांचवे सुवातेर बॅटिंगेक आयिल्ली श्वेता सेहरावत एक धांवडी करून बाद जाली.
युपी वॉरियर्सा वतीन मुखेली एलिसा हिलीन सगल्यांत चड धांवड्यो केल्यो. तिणें 38 बॉलांनी 55 धांवड्यो केल्यो. हातूंत सात चवक्यांचो आनी तीन सक्यांचो आस्पाव आशिल्लो. दिप्ती शर्मान 33 धांवड्यांचें योगदान दिलें. पुनम खेमनारान 31 धांवड्यो केल्यो.
ह्या जैता सयत रॉयल चॅलेंजर्स बंगळुरू गुणतकट्यांत तिसरे सुवातेर पावलो. बंगळुरू अजून मेरेन पांच मॅची खेळ्ळा, हातूंतल्यो तीन मॅची जिखला, जाल्यार दोन मॅचींनी हार घेवची पडल्या. दिल्ली कॅपिटल्स पयले सुवातेर आसा. तो चारांतल्यो तीन मॅची जिखला, मुंबय इंडियन्स लेगीत चारांतल्यो तीन मॅची जिखला. दोगांयचे समान स गूण आसात. पूण, बरे रनरेटीच्या नेटार दिल्ली कॅपिटल्स पयले सुवातेर आसा आनी मुंबय इंडियन्स दुसरे सुवातेर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
