बंगळुरूक अखेरेक जैत

भांगरभूंय | प्रतिनिधी

स्मृती मंधानाच्या फुडारपणाखाला खेळपी रॉयल चॅलेंजर्स बंगळुरून बायलांचे प्रिमियर लिगेंतलें (डब्ल्यूपीएल) पयलें जैत जोडलें. ताणें डॉ. डी व्हाय पाटील खेळां अकादमीच्या मैदानाचेर जाल्ले मॅचींत युपी वॉरियर्साक 5 विकेटींनी हारयलो. ह्या जैता सयत बंगळुरून प्ले ऑफांत सुवात मेळोवपाची आपली आस्त कायम राखली. युपी वॉरियर्सान दिल्ली 136 धांवड्यांची मोख बंगळुरून 18 ओव्हरींनी फकत पांच विकेटी वगडावन मेळयली.

मोखीचो फाटलाव करपी बंगळुरूची सुरवात बरी जाली ना. ओपनर सोफी डिव्हायन (14) बाद जाल्या उपरांत स्मृती मंधाना शुन्याचेर तंबूंत परतली. उपरांत एलिसा पेरीन 10 धांवड्यो केल्यो. पूण, कनिका आहुजा (46) आनी रिचा घोष (31) हांणी पांचवे विकेटी खातीर 46 बॉलांनी 60 धांवड्यांची म्हत्वाची भागिदारी केली. हे भागिदारीक लागून बंगळुरू जैताच्या लागसारा पावलो. हाचे पयलीं बंगळुरून 60 धांवड्यांचेर चार विकेटी वगडायिल्ल्यो.

ते आदीं टॉस हारल्या उपरांत पयलीं बॅटींग करपी युपी वॉरियर्सान ग्रेस हॅरीस आनी दिप्ती शर्मा हांचे भागिदारी नेटार 19.3 ओव्हरींनी 135 धांवड्यो केल्यो.

युपी वॉरियर्साची सुरवात खूब वायट जाली. ताणें दुसऱ्या बॉलाचेर सोफी डिव्हाईनान देविकाक एलबीडब्ल्यू बाद केली. तिका खातें लेगीत उगडपाक जमूंक ना. सव्या बॉलाचेर डेव्हाईनान एलिसा हिलीक बाद केली.

हिलीक तीन बॉलांनी फकत एक धांवडी करप शक्य जालें. मेगन शुटान डिव्हाईना उपरांत कहर केलो. तिणें रॉयल चॅलेंजर्स बंगळुरूक तिसरें येस मेळोवन दिलें. तिणें ताहलिया मॅकग्राक बाद केली. विकेटकीपर रिचा घोषान तिची कॅच धरली. मॅकग्रा दोन बॉलांनी फकत दोन विकेटी घेतल्यो.

युपी वॉरियर्सा वतीन ग्रेस हॅरिसान सगल्यांत चड धांवड्यो केल्यो. तिणें 32 बॉलांनी पांच चवके आनी दोन सक्यांचे मजतीन 46 धांवड्यो केल्यो. पूण, तिका चार धांवड्यांनी अर्द शेंकडो चुकलो. तिचे खेरीत किर नवगिरे आनी दिप्ती शर्मा हांणी दरेकी 22 धांवड्यो केल्यो. तांकांच लागून युपी वॉरियर्साक 120चो टप्पो हुपपाक शक्य जालें.

ग्रेस आनी दिप्ती हांणी केल्ले 69 धांवड्यांचे भागिदारीक लागून युपी वॉरियर्साक 19.3 ओव्हरींनी सगल्यो विकेटी वगडावन 135 धांवड्यो करप शक्य जाल्यो.

रॉयल चॅलेंजर्स बंगळुरू वतीन एलीस पेरीन सगल्यांत चड विकेटी घेतल्यो. तिणें चार ओव्हरींनी 16 धांवड्यो दितना 3 विकेटी घेतल्यो. ताचे खेरीत आशा शोभना आनी सोफी डिव्हाईन हिणें दरेकी 2 विकेटी घेतल्यो. मेगन शुटाक एक विकेट फावो जाली.