भांगरभूंय | प्रतिनिधी
पणजी : सायबर गुन्यांव तशेंच हेर अर्थीक फटींगपणाचे गुन्यांव उणे करपा खातीर अर्थीक साक्षरता आसप गरजेचें. हाका लागून राज्यांतल्या बँकांनी, विवीध शिक्षण संस्थांनी वचून अर्थीक साक्षरता जागृताय अभियानाचें आयोजन करचें, असो उलो मुख्यमंत्री डॉ. प्रमोद सावंत हांणी मारलो. बिरेस्तारा राज्य पांवड्यावेले बँक समितीच्या आढावो बसकेंत ते उलयताले. ह्या वेळार मुखेल सचीव व्ही कांदावेलू,
नाबार्डचे महावेवस्थापक संदीप धारकर, आरबीआयचे क्षेत्रीय वेवस्थापक प्रभाकर झा आनी हेर अधिकारी हाजीर आशिल्ले.
राज्यांतल्या बँकांनी डिजिटल बँकींग, सायबर गुन्यांव आडावप, जबाबदार गुंतवणूकदार तयार करप हे खातीर केल्लें काम तोखणाय करपा सारकें आसा. अशें जरी आसलें तरी हांव जेन्ना लोकां कडेन उलयतां तेन्ना कळटा, राज्यांत अर्थीक साक्षरतेचें प्रमाण आनीक वाडपाची गरज आसा. पद्वी पुराय करून बरे डॉक्टर, अभियंता, वकील भायर सरतात. मात तांचे मदींय सदचे जिणेंत गरजेचें आशिल्लें अर्थीक ज्ञान उणें आशिल्ल्याचें दिसता. हाका लागून बँकांनी गांवगिर्या भागां सयत महाविद्यालयांत अर्थीक साक्षरता जागृताय करप गरजेचें आसा, अशें तांणी म्हणलें.
फाटल्या अर्थीक वर्सा राज्यांतल्या बँकांनी तांकां दिल्लें रीण वाटपाच्या लक्षा मदलें ९० टक्के पुराय केलां, ही बरी गजाल. बँकांनी पर्यटन, एमएसएमइ, कृषी, स्टँड अप, नुस्त्याचो उद्देग अशे तरेच्या क्षेत्रा खातीर अदीक रीण उपलब्ध करून दिवचें. पांचव्या ऊर्जा क्षेत्राचेर चड भर दिवची. रीण प्रक्रिया आनीक सुटसुटीत करून तिचें रोखडेंच वाटप केल्यार ताचो सामान्य जनतेक फायदो जातलो. बँकांनी सीडी रेशो वाडोवपा खातीर यत्न करचे. विकसीत गोंय २०३७ खातीर बँकींग क्षेत्राचें सहकार्य गरजेचें.
आमी ह्यान पयलीं राज्यांतल्या खाजगी मळावेल्या कामगारांक मजत दिवपाची घोशणा केल्ली. ते प्रमाण खाजगी कंपनींतल्या कामगारांच्या विमा आनी हेर थारावीक सुविधांचो खर्च कामगार कल्याण निधींतल्यान दितले. हे प्रक्रियेंत बँकांनी सरकाराक सहकार्य करचें अशें मुख्यमंत्र्यान सांगलें.
ताफ्यांत फकत एकूच वाहन
प्रधानमंत्री नरेंद्र मोदीं हांच्या आवाहना उपरांत हांवें म्हज्या ताफ्यांतलीं वाहनां उणीं केल्यांत. आतां म्हज्या ताफ्यांत फकत एकूच वाहन आसा. इंधन वाटोवपा खातीर सगल्यांनी योग्य पावलां उबारचीं असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
