भांगरभूंय | प्रतिनिधी
पणजी : गोंयची विमान कंपनी फ्लाय 91 हांणी 18 एप्रील सावन गोंय ते अगत्ती आनी अगत्ती ते गोंय विमान सेवा सुरू केल्या. हाचे वांगडाच कंपनीन गोंय- जळगांव- गोंय आनी हैदराबाद ते जळगांव, जळगांव ते हैदराबाद सेवा सुरू केल्या. मंगळार, बिरेस्तार, शुक्रार आनी आयतार गोंयां सावन अगत्ती (लक्षद्वीप) मेरेन फ्लाय 91 विमान उड्डाण करतलें. हे सेवेचें भाडें 4391 रुपया आसतलें. तशेंच 1991 भाड्यान गोंय ते जळगांव आनी हैदराबाद ते जळगांव विमान सेवा आसतली.
फ्लाय 91 एमडी, सीईओ मनोज चाको हांणी लक्षद्वीपाक हें विमान कंपनीचें पांचवें थळ म्हणून जोडिल्ल्यान उमेद उक्तायली. कंपनी जुंव्याचें सोबीत थळ, दर्यादेग आनी जैवविविधताय हांचेर भर दिता, प्रवाशांनी ताची सोबीतकाय पळोवपाक आपयता. फ्लाय 91 प्रवाशांक प्रवास सोंपो आनी सोयीचो करपाक कटिबद्ध आसा, दरेका भारतीयाक प्रवास परवडटलो, अशें कंपनीन म्हणलां.
फ्लाय 91 च्या घरगुती नेटवर्कांत अगत्ती आनी जळगांव हांचो आस्पाव गिमाच्या सुटयेच्या हंगामा कडेन जुळटा. लक्षद्वीपांतलो अगत्ती जुंवो हो 6 किमी खोल दर्यांत नुस्तें मारप, स्कूबा डायविंग, सेलिंग, वॉटर स्कीइंग आनी कॅयकींग ह्या सारक्या कार्यावळीं खातीर एकदम योग्य आसा. बंगाराम, पिट्टी, थिंन्नकारा, परळी आनी करावती ह्या लागसारच्या जुंव्यांचेर भोंवपाक ही एक बरी सुवात.
फ्लाय91 एअरलायन्स आतां जळगांवच्या अद्भुत सुवातेर जोडल्या. महाराष्ट्रांतल्यान येवपी केळींचें दोन तृतियांश पीक जळगांवांतल्यान येता, देखून जळगांवाक ‘केळींचें शार’ अशेंय म्हण्टात. तशेंच विमानतळा सावन थोड्याच अंतराचेर आशिल्ल्या इतिहासीक अजंठा आनी एलोरा लेण्यांचें प्रवेशद्वार. सध्या फ्लाय 91 गोंय, हैदराबाद, बेंगळुरू आनी सिंधुदुर्ग ह्या थळांक विमान सेवा दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
