भांगरभूंय | प्रतिनिधी
संवसारीक फुटबॉल सर्तींत काल डी गटांत दोन म्हत्वाच्यो मॅची जाल्यो. एक मॅच सध्याचो वस्ताद फ्रान्स आनी ट्युनिशिया ह्या पंगडां मदीं जाली, हे मॅचींत फ्रान्साक 1-0 अशी हार घेवची पडली. पूण, हारून लेगीत फ्रान्स प्री-क्वॉर्टरफायनलीक पात्र थारलो.
फ्रान्स 2014तले संवसारीक फुटबॉल सर्ती उपरांत पयले खेपे हारलो.
गटांतले दुसरे मॅचींत ऑस्ट्रेलियेन डॅनमार्काक लेगीत 1-0 अशा फरकान हारोवन निमाण्या 16तली सुवात निश्चीत केली. ही मॅच बादाबाद उरता जाल्यार ट्युनिशिया प्री-क्वॉर्टरफायनलींत पावतलो आशिल्लो.
फ्रान्स आनी ट्युनिशिया ह्या पंगडां मदली मॅच सामकी उमळशीक वाडोवपी थारली. पयल्या अर्दांत दोनूय पंगडांक गोल करपाक अपेस आयलें. दुसऱ्या अर्दांत दोनूय पंगडांनी आपली ताकद लायली. पूण,येस ट्युनिशियाच्या हाताक लागलें. मुखेली वाहबी खजरीन दुसऱ्या अर्दाच्या 58व्या मिनटाक गोल करून आपल्या पंगडाक 1-0 अशी आघाडी मेळोवन दिली.
फ्रान्सान अतिरिक्त वेळांत (अॅक्स्ट्रा टायम) गोल करून बरोबरी सादिल्ली. पूण, रिव्ह्यूंत हो गोल वैध नाशिल्ल्याचें सिद्ध जालें. रॅफ्रीन ऑफ सायड दिली. अशे तरेन फ्रान्स बरोबरी करपा पसून चुकलो. फ्रान्साचो बदली खेळगडो ग्रीझमनान हो गोल केल्लो.
डी गटांतली दुसरी मॅच लेगीत उमळशीक वाडोवपी थारली. ऑस्ट्रेलिया आनी डॅनमार्क ह्या पंगडांक पयल्या अर्दांत गोल करपाक अपेस आयलें. पूण, दुसऱ्या अर्दांत ऑस्ट्रेलियेन उत्कृश्ट प्रदर्शन करतना आघाडी मेळयली. पंगडान 60व्या मिनटाक मॅथ्यू लेकीन गोल केलो. ह्या गोला नेटार ऑस्ट्रेलियेन 1-0 अशी आघाडी घेतली.
ह्या जैता सयत ऑस्ट्रेलिया पंगड संवसारीक फुटबॉल सर्तीच्या इतिहासांत दुसरे खेपे बाद फेरयेंत सुवात मेळोवपाक येसस्वी थारलो. हाचे आदीं ऑस्ट्रेलिया पंगड 2006चे संवसारीक सर्तीचे क्वॉर्टर फायनली मेरेन पाविल्लो.
डी गटांत फ्रान्साचे तीन मॅचींतल्यान स गूण जाल्यात. हातूंत दोन जैतांचो जाल्यार एके हारीचो आस्पाव आसा.
ऑस्ट्रेलियान लेगीत तीन मॅचींतल्यान दोन जैतां आनी एक हार घेतल्या. पूण, ताचो गोल फरक -1 आशिल्ल्यान तो दुसरे सुवातेर आसा.
ट्युनिशिया चार गुणां सयत तिसरे आनी डॅनमार्क फक्त एक गूण घेवन निमाणे म्हणल्यार चवथे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
