फ्रांस

भांगरभूंय | प्रतिनिधी

धर्तरेचेर आशिल्ल्या राष्ट्रां मदल्या सगळ्यांत पोरण्या राष्ट्रां मदीं फ्रांसाचो आसपाव जाता. विवीध वंश आशिल्लो हो देश. अधिकृतपणान ह्या देशाक फ्रँच रिपब्लीक म्हणून वळखतात. पॅरीस ही फ्रांसाची राजधानी. फ्रँच ही फ्रांसांतली मुखेल भास. चडशे लोक शारांनी वा नगरांनी रावतात. ते खातीर, सगळ्यांत आधुनीक देश म्हणुनूय फ्रांसाची वळख आसा. पर्यटनाच्या दृश्टीकोनांतल्यान संवसारांत सगळ्यांत चड भेट दिल्लो हो देश. फ्रांसांत 22 प्रांत आसात. तातूंत कॉर्सिको जुंव्याचो आसपाव आसा. ह्या वेगवेगळ्या प्रांतांची स्वताची अशी स्वतंत्र वळख आनी संस्कृताय आसा. पियरनीज आनी ऍल्स ह्या दोन दोंगरांची माळ फ्रांसांत आसा.
इतिहासीक सुवातो – 15व्या आनी 16व्या शेंकड्यांत फ्रांसांतल्या गिरेस्त कुलिनांनी बांदिल्ले शॅतो (chteaux) खूब फामाद आसात. शॅतो म्हणल्यार व्हडले किल्ले वा राजवाडे. लवा वॅली, बॉडो आनी हेर वाठारांनी हे शॅतो आसात. हे चडशे शॅतो सरकाराच्या ताब्यांत आसात आनी पर्यटकांक ते पळोवंक मेळटात. कितल्याशाच शॅतोंक संवसारीक दायज सुवात म्हणून घोशीत केल्यात.
द्राक्षांचे मळ – सुमार 2000 वर्सां पयलीं, रोमन्सांनी दक्षिणेंतल्या फ्रांसांत द्राक्षांचे मळे लायले. आयज द्राक्षां पसून वायन तयार करपी फ्रांस हो मुखेल देश थारला. फ्रांसांतल्यान वायनाची वेगवेगळ्या देशांनी निर्यात जाता.
पर्यटन थळां – फ्रांसांत राजवाडे, किल्ले, द्राक्षांचे मळे, संग्रहालयां आनी हेर कितल्याशाच पर्यटन सुवातींचो आसपाव आसा. ‘आयफल टावर’ हाका फ्रांसाचें चिन्न म्हणून वळखतात. 1889 वर्सा बांदिल्लो हो आयफल टावर पर्यटकां खातीर मुखेल आकर्शण थारला. संवसारांतले नामनेचे संग्रहालय फ्रांसांत आसात. मुजे दे लुवॉ वा लुव्रा म्युजियम ह्या संग्रहालयांत लियोनार्डो डी विन्ची, वॅरोनीज ह्या नामनेच्या कलाकारांची कलाकृती पळोवंक मेळटा. हॉल ऑफ मिरर्स, लेस जेर्दीन्स, मो सें मिशेल ह्यो फ्रांसांतल्यो हेर कांय फामाद सुवाती.
तंत्रगिन्यान – युरोपांतली टीजीवी ही सगळ्यांत वेगवान रेल्वे फ्रांसांत आसा. वराक 300 किलो मिटर मेरेन प्रवास करपी ही रेल्वे. 2007 वर्सा, सुदारीत टीजीवी रेल्वेन वराक 574.9 किलो मिटर प्रवास करपाचो वेगाचो विक्रम नोंद केलो. टीजीवी रेल्वेचें नॅटवर्क, पॅरीसाक देशांतल्या हेर मुखेल शारांक जोडटा तशेंच जर्मनी, इटली, बॅल्जियम ह्या देशांनी ह्यो रेल्वे वतात. न्युक्लियर पावर प्लांट म्हणल्यार अणू उर्जा प्रकल्पांक लागून फ्रांसांतली सुमार तीन चतुर्थांश वीज निर्मिती जाता. ताका लागून उर्जेचे बाबतींत फ्रांस हो आत्मनिर्बर देश. जल विद्यूत प्रकल्प लेगीत वीज निर्मिती खातीर मुखेल स्रोत थारल्यात. विमान वहन विद्येंतूय फ्रँच अग्रदूत आसा.
खाणां–जेवणां – फ्रँच फ्रायज, फ्रँच टोस्ट, चिकन बगॅट, फ्रँच कॅसेरोल, चीज सुफ्ले, स्पिनॅच एण्ड कॉर्न कीश आनी फ्रांसांतलीं हेर कितलीशींच खाणां-जेवणां भारतांत लोकप्रिय आसात. फ्रांसांत मेळपी चीज संवसारभर फामाद आसा. फ्रांसांत सुमार देड हजार चीजांचे प्रकार मेळटात. फ्रांसांतल्या ज्या प्रांतांत वा शारांत चीज तयार जाता त्या वाठाराचें नांव त्या चीजाक दितात.
टुवर दे फ्रांस – 1903 वर्सा टुवर दे फ्रांस ही सायकल सर्त सुरू जाल्ली. फ्रांसांतली ही म्हत्वाची खेळा सर्त. जुलय म्हयन्यांत ही सर्त जाता. दर दिसा, 20 वा ताचे परस चड पांवड्याचेर वांटून घालून सुमार 4,000 किलो मिटर सायकल चलोवपाची ही सर्त.