भांगरभूंय | प्रतिनिधी
सभाघरांत जाली चर्चा
पणजी, प्रतिनिधी : रेशनाचेर जो फोर्टिफायड तांदुळ दिता, ताचे सयत फोर्टीफायड तांदळाची म्हायती दिवपी पत्रकां दितले, अशें मुख्यमंत्री डॉ. प्रमोद सावंत हांणी आयज सभाघरांत सांगलें. आमदार कार्लुस फेरेरा हांचे प्रस्नाचेर उलयताना मुख्यमंत्र्यांन ही म्हायती दिली. सवाय धान्य दुकानांचेर फोर्टिफायड तांदुळ दिवपाक सुरवात केल्या. फोर्टिफायड तांदळाचे काय हेर परिणाम जावप शक्य आसा. थालसामिया वा सिकल सेल आशिल्ल्या दुयेंतींक फोर्टीफायड तांदुळ योग्य न्हय अशी शिटकावणी एफएसएसएआयन दिल्या, अशें कार्लुस फेरेरा हांणी सांगले. ह्या लोकांक उकडे तांदुळ दिवचे, अशी सुचोवणी तांणी केली. हे विशयाचेर सभाघरांत बरोच तेप चर्चा जाली.
फोर्टीफायड तांदळाच्या बदलाक उकडे तांदुळ दिवपाची वेवस्था करपाची सरकाराची तयारी आसा, अशें मुख्यमंत्री डॉ. प्रमोद सावंत हांणी सांगलें. सवाय धान्य दुकानांचेर फोर्टिफायड तांदळा सयत सगळी म्हायती दिवपी पत्रका वाटतले. इंग्लिश, मराठी आनी कोंकणीतल्यान ही पत्रका आसतली. फोर्टिफायड तांदुळ कोणाक योग्य आनी कोणाक योग्य न्हय, हाची म्हायती पत्रकांत आसतली. रेशनाचेर सदच्या वापरातलो तांदुळ दिवपाची वेवस्था जातली, अशेंय मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
