भांगरभूंय | प्रतिनिधी
फोंडें, प्रतिनिधी: फोंडेंच्या वयल्या बाजारांत फुटपाथाचेर विक्रेत्यांचें अतिक्रमण जाल्ल्यान बाजारांतल्या तिडकल्ल्या विक्रेत्यांनी पालिकेचेर सोमारा सकाळीं मोर्चा काडलो. पालिकेचे नगराध्यक्ष आनंद नायक आनी मुख्याध्याकारी योगीराज गोसावी हांचे कडेन चर्चा केले उपरांत फुटपाथावेल्या विक्रेत्यांक मार्केट संकुलनाचे सुवातेर स्थलांतर करपाचें आस्वासन तांणी दिलें.
चवथ आनी दिवाळेच्या सणां वेळार विक्रेते व्हडा संख्येन फुटपाथाचेर बसून वेवसाय करतात. हाचो परिणाम बाजारांतल्या विक्रेत्यांचेर जाता. फाटल्या कांय दिसां सावन वयल्या बाजारांतल्या फुटपाथार जायते विक्रेते बसून वेवसाय करतात. ताका लागून तिडकल्ल्या बाजारांतल्या विक्रेत्यांनी मोर्चा काडून नगराध्यक्ष आनी मुख्याधिकर्यां कडेन चर्चा केली. तेन्ना नगराध्यक्ष आनंद नायक हांणी सोमारा सांजेवेळार पालिका मंडळाची बसका आसा. तेन्ना विक्रेत्यांचो प्रस्न सोडयतले. फुटपाथावेल्या विक्रेत्यांक बाजार संकुलनांत आशिल्ले सुवातेर स्थलांतर करतले अशें तांणी सांगलें.
विक्रेत्यांचे मुखेली घारू सावंत हांणी फुटपाथार अतिक्रमण जाल्ल्यान बाजारंत गिरायकां येनात. हाचो अर्थीक परिणाम बाजारांतल्या विक्रेत्यांक सोसचो पडटा. नगराध्यक्ष आनी मुख्याधिकारी हांणी हे विशीं तोडगो काडून मार्केटांतल्या विक्रेत्यांचो सोडोवपाचें आस्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
