भांगरभूंय | प्रतिनिधी
दोन घडणुकांनी वाहनाचें आनी रस्त्याचें लुकसाण
फोंडें, प्रतिनिधी: फोंडें आनी धारबांदोड्यां घोग्यांनी पडिल्ल्या पावसाक लागून लोकजीण विस्कळीत जाल्या. ह्या घोग्यांनी पडपी पावसांत हाऊसिंगबोर्ड – कुट्टी हांगा मोटार ड्रायव्हर आरिफ सय्यद (२०, उसगांव) हाणें लोखणाचे वंयेक धपको दिल्ल्यान तो जखमी जालो. जाल्यार दुसरे कडेन ढवळे मुखेल रस्त्याचेर झाड पडिल्ल्यान बोरी – फोंडेंच्या मार्गा वयली येरादारी आडकून उरली.
हावसिंग बोर्ड – कुट्टे जीए- ०८- एन -८४९७ नंबराची गाडी फर्मागुडी वताली. पावसाक लागून नियंत्रण गेल्ल्यान गाडयेचो धपको लोखणाचे वंयेक बसलो. तातूंत आरिफ जखमी जालो. फोंडें उजो पालोवपी दळाच्या जवानांनी ताका भायर काडले उपरांत उपजिल्हो हॉस्पिटलांत दाखल केलो. उपरांत ताका फुडल्या उपचारा खातीर गोमॅकोंत धाडलो.
खांडेपारा रस्त्या कुशीक आशिल्लें झाड कोसळिल्ल्यान रस्तो नेमलो. फोंडें उजो पालोवपी दळाच्या जवानांनी घडणुके सुवातेर वचून झाडा कुशीक काडलें. कवळ्यांय शेनवारा रातीं उसरां रस्त्याचेर झाड पडलें. ढवळे सकाळीं रस्त्याचेर झाड कोसळिल्ल्यान रस्तो नेमलो. ताका लागून हांगा येरादारी ठप्प जाली. घडणुके वेळार रस्त्यार वाहनां नाशिल्ल्यान अपघात जावपाचो वाटवलो.
बेतोड्यां जंक्शना लागसारा रस्त्याच्या कुशीक आशिल्ली माती पावसाच्या उदकान व्हांवून गेल्ल्यान जमनी पोंदच्यो लायटीच्यो सरयो दिसपाक लागल्यात. आयतारा दनपरां थळाव्या लोकांनी वीज खात्याच्या अभियंत्यांक म्हायती दिले उपरांत तांणी ह्या वाठारांत वचून पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
