भांगरभूंय | प्रतिनिधी
फोंडें: दक्षीण गोंयचे काँग्रेस उमेदवार विरियातो फर्नांडीस हांचें जैत जाल्ल्यान फोंडें काँग्रेस गट समिती वतीन जैत मनयलें. त्या वेळार काँग्रेसीचे राजेश वेरेंकार, फोंडें काँग्रेस गट समितीचे अध्यक्ष विलीयम अगीयार, अरुण गुडेकार, शब्बीर मुल्ला, फ्रान्सीस फर्नांडीस, आदले सरपंच सांतान फर्नांडीस, नारायण नायक आनी हेर कार्यकर्ते व्हड संख्येन हाजीर आशिल्ले.
ह्या वेळार अदीक म्हायती दितना राजेश वेरेंकार हांणी दक्षीण गोंयांत काँग्रेस पक्षाचो उमेदवार जैतिवंत जाल्लो आसून आमदारांनी पक्षांतर केलें तरी ताचो परिणाम काँग्रेसीचेर जाल्लो दिसून येना. ताचे वेल्यान लोकांक पक्षांतर करप्यांक न्हयकारिल्ल्याचें दिसून येता. जैतिवंत जाल्ले विरियातो फर्नांडीस निश्चीत लोकांचे प्रस्न सोडयतले. कारण गोंयचो आवाज आशिल्ले विरियातो फर्नांडीस आतां भारताचो आवाज जाल्यात अशें तांणी म्हणलें.
भाजपान सरकारी यंत्रणा तशेंच सत्तेचो वापर करून दक्षीण गोंयांत जैत मेळोवपा खातीर यत्न केले. पूण लोकांच्या विस्वासाचेर काँग्रेसीचे विरियातो फर्नांडीस हांणी जैत मेळयलें. फोंडें वाठाराची समस्या सोडोवपा खातीर नवे खासदार निश्चीतपणान फोंडें म्हालांत दरेक तीन म्हयन्यांनी भेट दितले अशें राजेश वेरेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
