भांगरभूंय | प्रतिनिधी
फोंडेंः फोंडें विधानसभा पोटवेंचणुकेचे फाटभुंयेर ९ एप्रिलाक जावपी वेंचणुकेची प्रक्रिया शांततायेन आनी सुटसुटीत जावची हे खातीर प्रशासनान वेगवेगळे निर्णय घेतल्यात. ते प्रमाण फोंडेंच्या सरकारी भोव मजली इमारत संकुलाच्या पार्किंगांत सगले तरेचीं खाजगी वाहनां पार्क करपाचेर तात्पुरती बंदी घाल्या. हो आदेश ६ एप्रीलाक सकाळीं १० वरांचेर लागू जातलो आनी १० एप्रील मेरेन लागू आसतलो.
हातूंत तिस्क-फोंडेंचे हांगाच्या सरकारी भोव मजली इमारत संकुलाच्या पुराय पार्किंग वाठाराचो आस्पाव आसा. वेंचणूक आयोगान जाहीर केल्ल्या वेळापत्रका प्रमाण ८ एप्रीलाक मतदान पंगड वचप आनी ९ एप्रीलाक मतदान केल्या उपरांत ईव्हीएम, व्हीव्हीपीएटी आनी हेर वेंचणुकेचें सामान हेच सुवातेर एकठांय करतले. हे प्रक्रियेंत ट्राफीक जाम वा हेर कसलींच आडमेळीं येवचीं न्हय आनी भौशीक सुवेवस्था तिगोवन दवरपा खातीर उपविभागीय दंडाधिकारी कौशिक डी. आमोणकार हांणी प्रतिबंधात्मक आदेश जारी केल्यात.
भारतीय वेंचणूक आयोगाचे निरिक्षक आनी मुखेल वेंचणूक अधिकारी हांचीं अधिकृत वाहनां, ड्युटीचेर आशिल्ल्या पुलीस अधिकार्यांचीं वाहनां, दंडाधिकारी आनी वेंचणूक अधिकारी, एम्ब्युलन्स, उजो पालोवपी दळ आनी सक्षम प्राधिकरणान खासा परवानगी दिल्ल्या आपत्कालीन वाहनांक हे पार्कींग बंदींतल्यान सुट दिल्या.
फोंडें पुलीस निरीक्षक आनी फर्मागुडीच्या येरादारी कुडीक ह्या आदेशाची खर अंमलबजावणी करपाचे निर्देश दिल्यात. आदेश मोडून पार्क केल्लीं वाहनां ओडून व्हरपाची वा जप्त करपाची कारवाय करपाक शकतात, अशीय शिटकावणी आदेशांत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
