भांगरभूंय | प्रतिनिधी
फोंडें: फोंडें वाठारांत रातच्या वेळार बैलाची तस्करी करपाची टोळी कार्यरत आशिल्ल्यान प्राणी मित्र सतर्क जाल्यात. फाटल्या मंगळारा रातच्या वेळार वाहनांतल्यान एका बैलान स्वताची सुटका करून दोरये सयत प्राणी मित्रांक सांपडलो. वाठारांतल्यान अज्ञाता कडल्यान गोरवां उबारून व्हरत आशिल्ल्यान पुलिसांनी गस्त वाडोवपाची मागणी लोकां कडल्यान जायत आसा.
खांडेपारा रस्त्यार मंगळारा रातीं प्राणी मित्रांक एक बैल गळ्यांत दोर बांदिल्ले अवस्थेंत दिसून आयलो. प्राणी मित्रांनी अदीक तपासणी केली तेन्ना वाहनांतल्यान सुटून गेल्ल्या बैलाक कांय जाण सोदत आशिल्ल्याचें दिसून आयलें. पूण प्राणी मित्र दिसतकूच अनवळखी मनशांनी वाहना सयत पळ काडलो.
बुधवारा प्राणी मित्रांनी अदीक चवकशी केली तेन्ना वाघुर्में हांगासरले दोन बैल बेपत्ता जाल्ल्याचें समजलें. ताका लागून वाठारांत रातच्या वेळार अनवळखी मनीस गोरवांची तस्करी करून बेकायदो कत्तल करीत आशिल्ल्याचो दुबाव उक्तायतात.
फोंडें तशेंच धारबांदोडें म्हालांत फाटल्या कांय म्हयन्यां सावन खूबशीं गोरवां गायब जायत आशिल्ल्याचे प्रकार घडत आशिल्ल्यान बेकायदो कत्तल करपा खातीर गोरवांक उबारून व्हरत आशिल्ल्याचो दुबाव आसा. रातच्या वेळार गोरवांक उबारून व्हरप्यांक धरपा खातीर पुलिसांनी मध्यान रातीं गस्त घालपाची मागणी थळावे लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
