भांगरभूंय | प्रतिनिधी
रस्त्यार अवजड वाहनां पार्क केल्ल्यान येरादारीक आडखळ
फोंडें: फोंडें म्हालांत दीसपट्टी कोट्यांनी रुपयांची उलाढाल जावपी कुंडय, उसगांव, बेतोडें आनी मडकय ह्यो चार उद्देगीक वसणुको आसून म्हाल व्हरपी ट्रक पार्क करपा खातीर अजून मेरेन ट्रक टर्मिनल उबारिल्लो ना. ताका लागून कुट्टी, ढवळे, बेतोडें आनी उसगांव वाठारांत रस्त्याचे कुशीक अवजड वाहनां पार्क केल्ल्यान हेर येरादारीक आडखळ निर्माण जायत आसा. राज्यांतल्या येरादारी मळार म्हत्वाची कामगिरी करपी अवजड वाहन चालकांक गरजेच्यो सुविधा दिवपा सयत ट्रक टर्मिनल उबारपाची मागणी लोकां कडल्यान जायत आसा.
कुट्टी, ढवळे आनी बेतोडें बायपास रस्त्यार नदर मारल्यार रस्त्याचे कुशीक पार्क केल्लीं अवजड वाहनां हेर वाहनांक त्रासदायक थारत आसात. हेर राज्यांतल्यान उद्देगीक वसणुकांनी यो-वच करपी अवजड वाहनां रस्त्याचे कुशीक पार्क केल्ल्यान हाचे पयलीं खूबशे अपघात जावन लोकांक आपलो जीव लेगीत व्हगडावचो पडला. रस्त्याचे कुशीक पार्क करपी ट्रक अचकीत मुखेल रस्त्यार येत आशिल्ल्यान अदीं मदीं अपघात घडत आसतात. म्हालांतल्या चार उद्देगीक वसणुकांनी यो-वच करपी ट्रक चालकांक शौचालयाची वेवस्था नाशिल्ल्यान रस्त्याचे कुशीक उक्तडार ट्रक चालक सैमीक विधी खातीर वतात. ताका लागून वाठारांत घाण पातळून दुयेंसां जावपाची भिरांत थळावे लोक उक्तायतात.
फोंडें वाठारांत येरादारी कंत्राटदारांची सुमार 250 परस चड कचेरी आसात. गोंयांत चडांत चड उद्देगीक वसणुकांनी फोंडेें येरादारी कचेरेंतल्यान अवजड वाहनांची पुरवण करतात. ताका लागून फोंडें वाठारांत अवजड वाहनांची वर्दळ वाडत आशिल्ल्याचेंे दिसून येता. येरादारी कंत्राटदारांनी हाचे पयलीं खूबशे फावटी सरकारा कडेन ट्रक टर्मिनल उबारपा खातीर खूबशीं निवेदनां दिल्यांत. येरादारी कंत्राटदारांनी फाटल्या 10-12 वर्सां सावन कितलेशेच फावटीं वेगळ्यावेगळ्या मंत्र्यां कडेन बसका घेवन लेगती ट्रक टर्मिनल उबारपा खातीर यत्न केल्ले. पूण सरकार अजून मेरेन ट्रक टर्मिनल उबारपा खातीर घोशणा सोडून हेर सोपस्कार पुराय करपाक अपेशी थारलां.
मडकय, उसगांव, बेतोडें आनी कुंडय हांगासरल्या उद्देगीक वसणुकांनी येवपी अवजड वाहनांची वर्दळ वाडल्या. हेर राज्यांतल्यान येवपी ट्रक चालकांक गरजेच्यो सुविधा उपलब्ध नाशिल्ल्यान चालकांची गैरसोय जायत आसा. ट्रक टर्मिनल उबारून हेर राज्यांतल्या ट्रक चालकांक बरी सुविधा दिवपा खातीर सरकारान यत्न करूंक जाय. ट्रक टर्मिनल उबारल्यार वाठारांत जावपी अपघात तशेंच गोरवां जखमी जावपाचे प्रकार नियंत्रणांत येतले अशें फोंडेंच्या विनोद भानुशाली ह्या तरणाट्यान सांगलें.
संजिवनी साकर कारखान्याचे सुवातेंत सद्या पे पार्कींग सुविधा उपलब्ध करून दिल्या. ताचो लाव कांय मेजक्याच अवजड वाहन चालकांक मेळटा. दोन वर्सां पयलीं सरकारान संजिवनी साकर कारखान्याची दोन लाख चौखण मिटर सुवात ट्रक पार्किंगे खातीर दिवपाची प्रक्रिया सुरू केल्ली. पूण ही प्रक्रिया अजून पुराय जाल्ली दिसून येना. ताका लागून राज्यांतलो ट्रक टर्मिनलाचो प्रस्न दीसपट्टो वाडत आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
