भांगरभूंय | प्रतिनिधी
पणजी: फोंडें विधानसभा पोटवेंचणुकेक देंविल्ले ‘आम आदमी पक्षा’चे उमेदवार गीतेश नायक हांकां सुमार ५ लाख रुपयांच्या चेक बावन्स प्रकरणांत सेगीत समन्स धाडूनय न्यायालयात गैरहाजीर राविल्ल्यान मेरशेच्या दिवाणी आनी फौजदारी न्यायालयान तांचे आड अजामीनपात्र वॉरंट जारी केलां. फाटल्या दोन वर्सां सावन नायक हे मुद्दम न्यायालयाची पायरी चडनाशिल्ले अशें निरीक्षण नोंद करून न्यायालयान हो खर निर्णय घेतला.
हें पुराय प्रकरण २०२१ तल्या एका वेव्हारा कडेन संबंदीत आसा. कागाळदार श्यामसुंदर मिरजकर हांणी गीतेश नायक हांचे आड कागाळ दाखल केल्ली. मिरजकर हांच्या दाव्या प्रमाण, एका कायदेशीर प्रक्रिये मजगतीं नायक हांणी तांकां ५ लाख रुपयांचो चेक दिल्लो, जो बँकेंत गेलोना. ह्या प्रकरणांत न्यायालयांत खटलो सुरू जाले उपरांत नायक हांणी नेमान हाजेरी लावंक ना. ३० माचारक जाल्ले सुनावणे मजगतीं नायक वा ताचे वकील न्यायालयांत हाजीर नाशिल्ले. तांच्या वकिलांनी मांडिल्ल्या हजेरींतल्यान सवलत मेळोवपाचो अर्जूय न्यायालयान भायर मारलो. हें प्रकरण तीन वर्सां आदलें आशिल्ल्यान आरोपी ८ एप्रील २०२४ सावन न्यायालयांत हाजीर रावूंक ना. गैरहजेरीचे कसलेंच खर कारण दिवंक नाशिल्ल्यान सवलतीचो अर्ज भायर मारला, अशें न्यायालयान आपल्या आदेशांत म्हणलां.
कागाळदार मिरजकार हांणी न्यायालयाक म्हायती दिल्ले प्रमाण, ह्यान पयलीं १८ मार्च २०२४ दिसा नायक हांचे आड अजामीनपात्र वॉरंट काडिल्ले. मात फुडाराक सगल्या तारखांक हाजीर रावपाचे अटीचेर तें रद्द केल्लें. ह्या अटींचो भंय करीत नायक जुलय ते डिसेंबर २०२४ मजगतीं जायते फावटीं गैरहजर रावले. इतलेंच न्हय अटक वॉरंटची अंमलबजावणी करपा खातीर पुलीस संरक्षण दिवनय नायक अटकेक कूस मारता असो आरोप कागाळदारान केला. हाका लागून न्यायालयान आतां ८ मे २०२६ दिसा फुडली सुनावणी निश्चीत केल्या.
दुसरे कडेन गीतेश नायक हांची उमेदवारी राजकी वादाच्या भोवर्यांत सांपडिल्ली. काँग्रेसचे हळदोणेचे आमदार अॅड. कार्लुस फेरेरा हांणी नायक हांच्या उमेदवारी अर्जाचेर आक्षेप घेतिल्लो. नायक हांणी गुन्यांवकारी प्रकरणाची म्हायती लिपयिल्ल्याचो आरोप फरेरा हांणी केला.
मजगतीं, वेंचणूक निर्णय अधिकार्यांनी नायक हांची उमेदवारी वैध जरी थारयल्या तरी अजामीनपात्र वॉरंटाक लागून तांच्या वेंचणूक प्रचाराचेर व्हड सांवट निर्माण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
