भांगरभूंय | प्रतिनिधी
कन्हैयाकुमार मरण प्रकरण
मडगांव: कन्हैयाकुमार मंडळाच्या (32) मृत्यू प्रकरणांत सगल्यांत मोटो पुरावो हो वैजकी अहवाल थारलो. उपरांतूच मायणा कुडटरी पुलिसांनी हीट अॅण्ड रन प्रकरण न्हय जाल्यार खून आशिल्ल्याचें स्पश्ट जालें. आतां फोंडें पुलीस स्टेशना वेली सीसीटीव्ही फुटेज म्हत्वाचो पुरावो आसतली आनी ती मेळोवपा खातीर मायणा कुडटरी पुलीस यत्न करीत आशिल्ल्याचें पुलीस अधिक्षक सुनिता सावंत हांणी सांगलें.
लोटले वेर्णा मिसींग लिंकाचेर 25 जून दिसा अनवळख्याची कूड सांपडली. हे घडणुके उपरांत मायणा कुडटरी पुलिसांनी हीट अॅण्ड रन प्रकरण नोंद केलें आनी वैजकी अहवाला उपरांत खुनाचें कलम नोंद केलें. कुडीची वळख पटोवपा खातीर आयिल्ल्या सोयऱ्यांकूय कन्हैयाकुमाराक फोंडें पुलिसांनी ताब्यांत घेतिल्ल्याचें सांगलें. मायणा कुडटरी पुलिसांनी फोंडें पुलिसांच्या ताब्यांतली व्यक्ती लोटले कशी आयली, हाचो सोद घेतना फोंडें पुलिसांच्या रॉबर्ट वाहनान ताका हाडून सोडिल्ल्याचें समजलें.
ते प्रमाण पुलिसांनी हवालदाराचो जबाब नोंद केलो. पूण वैजकी अहवालांत गळो, हाता सयत पोटार वार केल्ल्याचें दिसलें. तशेंच वाहन आंगा वेल्यान वच्चे पयलींच कन्हैयाकुमाराक मरण आयिल्ल्याचें स्पश्ट जालें. वैजकी अहवाला प्रमाण खुनाचो गुन्यांव नोंद जालो.
दक्षीण गोंय पुलीस अधिक्षक सुनिता सावंत हांणी सेवेंत हलगर्जीपणा केल्ल्या प्रकरणांत फोंडें पुलिसांच्या रॉबर्ट वाहना वेले हवालदार रवींद्र नायक, कॉन्स्टेबल अश्वीन सावंत आनी वाहन चालक प्रितेश प्रभू हांकां निलंबीत केले.
ट्रक चालकाचेर खुनाचो गुन्यांवकन्हैयाकुमार मरण प्रकरणांत ट्रक चालक वासुदेव हनुमंत मदार (59, रा. खानापूर, कर्नाटक) हाका अटक जाली आसून सद्या पुलीस कोठयेंत आसा. गाडी आंगा वेल्यान गेली त्या वेळार कन्हैयाकुमाराक मरण आयिल्लें अशें वैजकी अहवालांतल्यान स्पश्ट जाल्लें आसतना ट्रक चालकाचेर खुनाचो गुन्यांव कित्याक नोंद केलो हाचेर पुलिसांचो अजुनूय तपास सुरू आशिल्ल्याची जाप दिली.
कित्याक नोंद केलो हो प्रस्न
कन्हैयाकुमाराक मरण हें कुडी वेल्या खोल घाव्याक लागून जाल्ल्यान अजून लेगीत ह्या प्रकरणांत खरो गुन्यांवकार सोदपाचें आव्हान पुलिसां मुखार आसा.
सीसीटीव्ही फुटेज म्हत्वाचो पुरावो
फोंडें पुलिसां कडल्यान रॉबर्ट वाहनान कन्हैयाकुमाराक लोटले हाडून सोडिल्ल्याचें सांगतात. पूण पुलीस स्टेशना वेली सीसीटीव्ही फुटेज मेळत नाशिल्ल्यान ह्या प्रकरणांत कितेंय तरी लिपयतात काय कितें असो दुबाव उप्रासता. सीसीटीव्ही फुटेज अजून मेळिल्ली ना. ताचें विश्लेशण करपाचें काम सुरू आसा. हो ह्या प्रकरणांतलो म्हत्वाचो पुरावो आसतलो अशें दक्षीण गोंय पुलीस अधिक्षक सुनिता सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
