भांगरभूंय | प्रतिनिधी
पणजी: ह्या वर्साची ‘नीट’ परिक्षा येता ते 5 मे दिसा एनआयटी गोंयच्या कुंकळ्ळी कॅम्पसांत जातली. ताका लागून गोंयच्या विद्यार्थ्यांनी फोंडें कॅम्पसांत वचनासतना कुंकळ्ळी कॅम्पसांत वच्चें अशें आवाहन एनआयटी गोंयचे संचालक ओ.आर. जैस्वाल हांणी केलां.
एनआयटी गांयचें फोंडें सावन कुंकळ्ळी कॅम्पसांत स्थलांतर जालां. हाका लागून ह्या वर्साची नीट परिक्षा फोंड्यां जातली काय कुंकळ्ळे हे विशीं विद्यार्थी आनी पालकां मदीं गोंदळ निर्माण जाल्लो. गोंय एनआयटीचें फोंडें सावन कुंकळ्ळी कॅम्पसांत स्थलांतर जाल्ल्याची म्हायती आमी नीट परिक्षेच्या आयोजकांक दिल्ली. पूण तांचे कडल्यान हॉल तिकेट खंयच्या नाम्यार दितात हाची म्हायती आपल्याक ना. ताका लागून विद्यार्थ्यांनी गोंदळांत पडनासतना परिक्षे खातीर कुंकळ्ळी हांगासरल्या एनआयटी कॅम्पसांत वच्चें. विद्यार्थ्यांनी फोंडें कॅम्पसांत वच्चें न्हय हे खातीरचे यत्न आमी करीत आसात अशें जैस्वाल हांणी सांगलें.
मजगतीं, हाचे पयलीं एनआयटी फोंड्यां सुरू आशिल्ली. सरकारान एनआयटी खातीर कुंकळ्ळे सुवात दिल्ली. उपरांत थंय एनआयटी खातीर इमारत उबारून एनआयटीचें फोंडें सावन कुंकळ्ळे स्थलांतर केलां. ताका लागून सद्याचे स्थितींत सगलो कारभार कुंकळ्ळी कॅम्पसांतल्यानूच सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
