भांगरभूंय | प्रतिनिधी
बोडगेश्वर देवूळ चोरी प्रकरण
म्हापशें: जागृत देवस्थान श्रीदेव बोडगेश्वर देवळांत जाल्ल्या धाडशी चोरी प्रकरणांतल्या चारूय दुबावीत चोरांक म्हापशें न्यायालयान आनीक तीन दीस पुलीस कोठी दिल्या.
राजू फरत शेख (27, रा कोलकाता, अस्तंत बंगाल आनी मूळ बांगलादेश), इम्रान शहीद शेख (24, रा. सुरत गुजरात), राकीब कुलमोहम्मद शेख (28, रा. सुरत गुजरात) आनी मुजाहीद गुलजार खान (28, रा. पुणें आनी मूळ झारखंड) हांकां 21 वेर पुलिसांनी म्हापशें न्यायालयांत हजर करतकूच दुबावितांक आनीक तीन दीस पुलीस कोठयेंत दवरपाचो आदेश दिला.
म्हापशें पुलिसांनी शेनवारा 11 वेर दुबावीत आरोपींक खोपोली महाराष्ट्र पुलिसां कडल्यान हस्तांतरीत पद्दतीन ताब्यांत घेवन अटक केल्ली. उपरांत दुबावितांक न्यायालयान 9 दिसांची पुलीस कोठी दिल्ली.
मजगतीं, फाटल्या सोमारा 29 एप्रील 2024 दिसा उत्तर रातीं 2.05 ते 2.38 वरांच्या सुमाराक हो बोडगेश्वर देवळांत चोरयेचो प्रकार घडिल्लो. चार अनवळख्या चोरांनी देवळांतलो सुरक्षा रक्षक कागाळदार दशरथ ठाकूर (61) हांकां धमकावन आनी कदेलाक बांदून दोन फंडपेटयो फोडिल्ल्यो. ह्या दोनूय फंडपेटयेंतल्यान तीन पोतयो भरून सुमार 10 ते 12 लाखांची रोख रक्कम ह्या चोरांनी फारायिल्ली. देवळांत घडणुकेच्या दिसा उत्तर रातीं 2.40 वरांचेर एक भावीक देवदर्शनाक आयले उपरांत हो चोरयेचो प्रकार उक्तडार आयिल्लो.
देवळांतलो हो चोरयेचो प्रकार सीसीटीव्ही फुटेजींत कैद जाल्लो. पुलिसांनी तपासा वेळार हे अनवळखी चोर पत्रादेवी मार्गान सावंतवाडीचे दिशेन गेल्ल्याचें समजलें. तशेंच अशेच तरेच्यो चोरयो महाराष्ट्रांत घडिल्ल्यो. ते प्रमाण म्हापशें पुलिसांनी खोपोली पुलिसांक हाची म्हायती दिली.
उपरांत सावंतवाडी आनी कोल्हापूर मजगतीं, खोपोली पुलिसांनी 30 एप्रील दिसा ह्या दुबावितांक अटक केली. दुबावितां कडल्यान त्या वेळार 7.20 लाखांची रोख रक्कम तशेंच मोबायल फोन, स्क्रुड्रायव्हर आनी हेर वस्तू जप्त केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
