भांगरभूंय | प्रतिनिधी
वास्को, प्रतिनिधी: पर्यटक प्रवासी येरादारी करपा विशीं कसलेच तरेचो परवानो नासून लेगीत निश्काळजीपणान बोट चलोवन स्वता सयत बोटींतल्या २६ जाणांचो जीव धोक्यांत घाल्ले खातीर हार्बर कोस्टल पुलिसांनी ‘नेरूल पॅराडायज’ बोटीचो ऑपरेटर अभिषेक राठोड (२०) हाचे सयत धनी वासुदेव कळंगूटकार हांचे आड गुन्यांव दाखल केला. हे विशीं हार्बर कोस्टल पुलीस स्टेशनाचे उपनिरीक्षक प्रितेश गोवेकार फुडलो तपास करतात.
नेरूल पॅराडाईज बोट पणजेच्यान १९ मेक सांजेवेळार २४ पर्यटकां सयत दोन क्रू मेंबर्स भोंवडे खातीर आयिल्ले. उपरांत सांजेवेळार उसरां परत पणजे परततना बोटींतले पॅट्रोल सोंपिल्ल्यान तशेंच बोटी वयलें नियंत्रण सुटिल्ल्यान बोट कश्या कशीय वचपाक लागली. तशेंच प्रतिकूल हवामान आनी दर्याक भरती आयिल्ल्यान सुमार तीन मिटर उंचायेच्या ल्हाराक ही बोट सांपडली. बोटी वयल्या पर्यटकां मदीं बरोच बोवाळ जालो. तेन्ना गस्ती वयल्यान परतुवपी भारतीय तटरक्षक दळाच्या गस्ती बोटी एक बोट संकटांत सांपडिल्ल्याचें दिसलें. गस्ती बोट रोखडीच ते दिकेन गेली. उपरांत बोट मुरगांव बंदरात हाडली.
हे विशीं दखल घेवन हार्बर कोस्टल पुलिसांनी संबंधितां आड गुन्यांव नोंद केलो. ह्या बोटींतल्यान पर्यटक, प्रवाशी येरादारी करपाचो कसलेच तरेचो परवानो वा कागदपां संबंदीतां कडे नाशिल्लीं. तांणी प्रवाशी येरादारी करपाक कसलोच पत्रवेव्हार करूंक नाशिल्लो. ही बोट चलोवपी अभिषेक राठोड हाचे कडेन बोट चलोवपाचे कसलेच परवाने नाशिल्ले. परवानो नासून लेगीत दर्यांत निश्काळजीपणान बोट चलोवन पर्यटकांच्या तशेंच क्रू मेंबर्सांच्या जिवाक धोको निर्माण केलो.
मजगतीं, पांच वर्सां आदीं बायणा दर्यादेगे पसून कांय अंतराचेर आशिल्ल्या पाके जुंव्यार (बॅट आयलँड ) उदकाची भोंवडी करून परत दोनापवला वचपी एक बोट एके वटेन लवंडल्ल्यान तांतले पर्यटक उदकांत पडले. तेन्ना फाटल्यान येवपी हेर बोटींनी आनी दृश्टीच्या जीव रक्षकांनी त्या पर्यटकांक वाटायल्ले. ह्या भागांत व्हडा प्रमाणांत पर्यटकांक उदकाचे भोंवडे खातीर हाडटात. हातूंतल्या कितल्या बोट चालकां कडेन योग्य परवाने आनी कागदपत्रां आसात हे विशीं नेमान तपासणी करप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
