भांगरभूंय | प्रतिनिधी
पणजी : फोंड्यां सध्या आमदार नाशिल्ल्यान मतदारसंघांतले खुबशे नागरीक आनी कार्यकर्ते तांच्या विवीध कामां खातीर म्हज्या कार्यालयांत येतात, असो दावो वीजमंत्री सुदीन ढवळीकार हांणी केला. फोंडेचे जनतेचीं प्रशासकीय आनी वयक्तीक कामां आडकून उरचीं न्हय म्हणून हांव स्वता ताचे फॉर्म्स पडताळून ताचेर निशाणी करतां अशें तांणी स्पश्ट केलें.
थळावे नागरीक आनी कार्यकर्त्यां कडल्यान वाडपी चेंपणाक लागून आपूण बेगीनूच फोंड्यां एक नवीन जनसंपर्क कार्यालय सुरू करतलों अशीं घोशाण ढवळीकार हांणी केली. कांय म्हयन्यांनी ह्या नव्या कार्यालयाचें उक्तावण करतले, अशें तांणी सांगलें. आदल्या भाजप आमदारांच्या अचकीत वचपांत प्रलंबीत उरिल्ले दाखले आनी हेर विवीध कागदपत्रांचेर सदांच निशाण्यो करून नागरिकाक सुशेग दिवपाचें काम सुरू आसा. ह्या कामांत पक्षाचे आदले जिल्लो परिशद वांगडी आनी आदले-आतांचे नगरसेवक घराघरांनी वचून मजत करतात, अशें तांणी पत्रकारांनी विचारिल्ल्या प्रस्नांक जाप दितना स्पश्ट केलें.
येवपी वेंचणुकेंत रितेश नायक हांकां उमेदवारी मेळटली काय? ह्या प्रस्नाचेर उलयतना तांणी सांगलें, उमेदवारीचो निर्णय भारतीय जनता पक्ष घेतली. हांव फकत युती धर्म पाळटां. आमच्या कार्यकर्त्यांक सांबाळप आनी तांच्या कामांक प्राधान्य दिवप हें म्हजें कर्तव्य आशिल्ल्याचेंय मंत्री ढवळीकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
