भांगरभूंय | प्रतिनिधी
वेलिंग्टनः पयल्या डावांत 164 धांवड्यांचेर आवट जाल्या उपरांत श्रीलंकेक फॉलोऑन मेळ्ळो आनी तिसऱ्या दिसाचो खेळ सोपलो तेन्ना तांणी आपल्या दुसऱ्या डावांत 2 गडी ओगडावन 113 धांवड्यो केल्यो. न्यूझिलंडान आपलो पयलो डाव 4 आवट 580 धांवड्याचेर घोशीत केल्लो. श्रीलंका अजून 303 धांवड्यांनी फाटीं आसा.
श्रीलंकेची पयल्या डावाची सुरवात सामकी बाबत जाली.. तिसऱ्या दिसाची सुरवात कॅप्टन दासून करुणारत्ने आनी प्रभात जयसूर्यान केली. दासूनान एक बाजू लावंन धरली मात दुसरे वटेन विकेटी पडत रावल्यो. प्रभात जयसूर्या 4, एंजेलो मॅथ्यू 1, दिनेश चंडीमल 37, धनंजय डिसिल्वा 0, निशान मधुशंका 19, कसून रजिथा 0, आनी असिथा फर्नांडो 0 आवट जायत रावले. पयल्या डावांत डावांत कॅप्टन करुणारत्नेन सगल्यांत चड 89 धांवड्यो केल्ल्यो. मॅट हेन्रीन आनी मायकल ब्रेसवेलान दरेकी 3 विकेटी घेतिल्ल्यो.
श्रीलंकेन दुसऱ्या डावांत 2 विकेटी वोगडावन 113 धांवड्यो केल्यो. ओशादा फर्नांडो 5 धांवड्यो करून आवट जालो. कॅप्टन करूणारत्नेन अर्द शेंकडो करून डाव साल्वार केलो. कुशल मेंडीस 50 आनी एंजेलो मॅथ्यू 1 धांवड्यांचेर खेळटात. न्यूझिलंडाच्या डग ब्रेसवेल आनी टीम सावदीन देरेकी एक विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
