भांगरभूंय | प्रतिनिधी
नगराध्यक्ष दामोदर शिरोडकारः सात दिसांची फेरी नियोजन करुनूच
भांगरभूंय । प्रतिनिधी
मडगांवः पोरण्या बाजारांतली सात दिसांची फेस्ताची फेरी अंदूं नियोजन करून आनी शिस्तबद्द पद्दतीन आयोजीत करतले. येरादारी विशीं कांय जाणां मदीं हुस्को आसा, तोवूय पयस करतले. येरादारी पुलिशेच्या आदारान सातूय दीस येरादारीचेर नियंत्रण दवरतले, अशें नगराध्यक्ष दामोदर शिरोडकार हांणी सांगलें. बुधवारा घेतिल्ले पत्रकार परिशदेंत ते उलयताले.
वाहनां पार्किंगे खातीर पांच सुवातो निश्चीत केल्यात. लोकांचो आदार अपेक्षीत आसा. अंदूंचे फेस्ताचे फेरयेंत कसलोच उणाव जावपाक दिवचे नात. सात दिसां उपरांत सगळ्या फेरयेवाल्यांक आपापलीं दुकानां काडपाक सांगल्यात. फुटपाथीचेर, सेट बॅक सुवातेंत तशेंच वाहनां पार्कींग करपाचे सुवातेचेर कोणाकूच दुकानां घालपाक मेळचीं नात. सातूय दीस पुलीस तशेंच नगरपालिका अधिकारी गस्त घालतले. फेस्ताचे फेरये खातीर आराखडो तयार केला, अशी म्हायती नगराध्यक्ष शिरोडकार हांणी दिली.
पालिकेक सगळे तरेची मजत करतले, अशें येरादारी पुलीस निरिक्षक गौतम साळुंके हांणी उतर दिलां. फेस्ताचे फेरयेच्या वाठारांत नितळसाणीचेर चड भर दितले. ते खातीर चार शौचालयां, 12 कोयराचीं बल्लां दवरतले. पालिके वतीन 300 फेरीवाल्यांक दुकानां घालपाक परवानगी दिल्ल्याचें तशेंच दरेका कडल्यान सोपो कर म्हूण 1400 रुपया आनी कोयर वेवस्थापना खातीर 500 रुपया शुल्क घेतलां. फेरीवाल्यांक दुकानां वांटपांत नगरसेवकांचो कसलोच हस्तक्षेप जावंक ना, अशें नगराध्यक्षान सांगलें. एसजीपीडीए आपले सुवातेंत दुकानां घालपा खातीर फेरीवाल्यांक सुवात दितले. ताचेर पालिका सोपो कर घेतली. पोरूं परस अंदूं पालिकेक चड महसूल मेळपाची आस्त आसा, अशें नगराध्यक्ष शिरोडकार हांणी सांगलें. तशेंच तांणी पालिका मंडळा वतीन मडगांवकार, साश्टीकार, फातोड्डेंच्या लोकांक फेस्ताचीं परबीं दिलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
