भांगरभूंय | प्रतिनिधी
रो-रो फेरी सेवे वरवीं मेळपी महसुला विशींच्या प्रस्नाक सुभाष फळदेसाय हांचें स्पश्टीकरण
पणजी : गोंयच्या न्हंय परिवहन खात्या वतीन चलोवपी रो-रो फेरी सेवे वरवीं मेळपी महसुला विशीं हालींच एका आरटीआय कार्यकर्त्यान प्रस्न हाजीर केल्ले. हे फाटभूंयेर मंत्री सुभाष फळदेसाय हांणी सरकाराची भुमिका स्पश्ट करीत, फेरी सेवा हें सरकारचें जोडपाचें साधन न्हय, तर तें निव्वळ लोकसेवेचें माध्यम आशिल्ल्याचें ठामपणान सांगलें. कमर्शिअल तत्त्वाचेर ह्यो फेरयो चलय नाशिल्ल्यान, तांतल्यान व्हड वेवसायीक फायद्याची अपेक्षा दवरप चुकीचें थारतलें, अशें मत तांणी मांडलें. हे फेरी सेवेंत दुचाकीस्वार आनी चलून वचप्यां कडल्यान कसलीच तिकेट घेनात. हे फुकट सुविधेक लागून थळाव्यांक न्हंय पार करतना वट्ट २० किलोमीटरचो रस्तो आनी वेळ वाचता. ह्यान पयलीं दुचाकी वाहनांचेर फकत ५ रुपयांची नांवा पुरती तिकीट लावपाचो विचार जाल्लो, मात जनतेन ताका विरोध केल्ल्यान सरकारान तो निर्णय रद्द केलो. नेमान प्रवास करपी थळाव्या चारचाकी वाहनां खातीर म्हयन्याचो पास सामको सवलतीच्या दरांत म्हळ्यार दिसाक साधारण १० ते १५ रुपया खर्च येतलो अशे पद्धतीन उपलब्ध करून दिला, जाल्यार पर्यटकां खातीर ३० रुपया शुल्क आकारतात, अशें तांणी मुखार म्हणलें.
सध्या गोंयच्या ३२ विवीध जलमार्गांचेर फेर्यांचें संचलन करता. कांय मार्गांचेर सरकार कोट्यांनी रुपया खर्च करून खाजगी कंत्राटदारांकडल्यान फेर्यो भाडें तत्वाचेर घेता आनी जनतेक फुकट वा सवलतीच्या दरांत सेवा दिता. सध्या चोडण-रायबंदर ह्या फेरीमार्गार तशेंच हेर मार्गांचेरूय येरादारी बरीच वाडल्या. सदांच हजारांनी प्रवासी, दुचाकी आनी चारचाकी वाहनां हे सेवेचो लाव घेतात. प्रवाशांचे संख्येंत सुमार १०० टक्के वाड जाल्या. महसुलाचो विचार केल्यार पुराय ३२ मार्गांवेल्यान आदीं एकठांय ७० लाख रुपयांचें उत्पन्न मेळटालें, जाल्यार आतां फकत दोन मुखेल रो-रो फेर्यांच्या माध्यमांतल्यान फाटल्या आठ म्हयन्यांनी वट्ट ८० लाख रुपयांचो महसूल एकठांय जालो. वट्ट महसुलांत व्हड वाड नोंद जाल्ल्याचेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
