भांगरभूंय | प्रतिनिधी
मुख्यमंत्री: नोंदणी करूंक नाशिल्ल्यांचेर जातली कारवाय
पणजी: फुडल्या पंदरा दिसांत राज्यांतल्या कावलां अड्ड्यांची नोंदणी सुरू करतले. नोंदणी प्रक्रिया फुडले स म्हयने सुरू उरतली. नोंदणी करप बंधनकारक आसतली. ह्या काळांत नोंदणी करूंक नाशिल्ल्या कावलां अड्ड्यांचेर कारवाय करतले. पूण ही फक्त नोंदणी आसून नेमावळ ना अशें मुख्यमंत्री डॉ. प्रमोद सावंत हांणी सांगलें. आमदार डॉ. चंद्रकांत शेट्ये हांणी कावलां अड्ड्यांच्या नियमना खातीर मांडिल्ल्या खाजगी विधेयकाचेर ते उलयताले.
मुख्यमंत्र्यांनी म्हणलें, कावलां अड्ड्यांच्या धोरणाचो मसुदो आराखडो तयार जाला. तो सभाघराच्या पटलार दवरतले. आमदारांक हाचेर कसल्योय सुचोवण्यो दिवपाच्यो आसत जाल्यार ते दिवंक शकतात. आमकां कावलां अड्ड्यांच्या वेवसायांत आडखळ हाडपाचें ना. पूण तांचे खातीर नेम करप गरजेचें आसा. कावलां अड्डे लोकवस्तींतल्यान हेर कडेन हालोवपा खातीर एका वर्सा परस चड काळ लागूंक शकता.
तांणी म्हणलें, कावलां अड्ड्यांक नोंदणी करतना त्या वाठारांतल्या पंचायतीचो कर भरिल्ल्याचीं कागदपत्रां आसप गरजेचीं आसा. तशेंच कावलां अड्ड्यांक वेवसायीक वीज आनी उदक जोडणी आसप गरजेची आसा. घरगुती जोडण्यो आशिल्ल्यांची नोंदणी करचे नात. तशेंच सुवात धनयाचो हरकत ना प्रमाणपत्र आसप गरजेचें आसा. नोंदणी जाले उपरांत त्या कावलां अड्ड्यां मदीं खंयच्यो गजाली येतात हाची म्हायती सरकारा कडेन आसतली. ताका लागून तांचेर नियंत्रण उरचे ना.
ताचे पयलीं सभाघरांत हाजीर आशिल्ल्या सगल्या आमदारांनी कावलां अड्डे लोकवस्तींतल्यान काडून उडोवपाची मागणी केली. डॉ. चंद्रकांत शेट्ये हांणी कावलां अड्ड्यां खातीर नेमावळ आसप गरजेची आशिल्ल्याचें सांगलें. अड्ड्यांचेर कसलें साहित्य येता, खंयच्यान येता, ताचो विलो कसो लायतात हे विशींचें धोरण करचें अशें तांणी सुचयलें. विजय सरदेसाय हांणी कावलां अड्डे नाकाच अशी भुमिका घेवंक मेळची ना. अड्डे बंद करीत जाल्यार लोक रस्त्यार कावल उडयतले अशेंय तांणी म्हणलें.
निलेश काब्राल हांणी कावलां अड्डे आतांचे नासून फाटलीं 35 ते 40 वर्सां सुरू आशिल्ल्याचें सांगलें. अड्डे आशिल्ल्यान राज्यांतल्यो खूबश्यो वस्तू रिसायकल जातात. ताका लागून ते बंद करिनासतना तांचे नियमन करप गरजेचें आशिल्ल्याचें तांणी सांगलें.
विरोधी पक्ष फुडारी युरी आलेमांव हांणी कावलां अड्डे हे टायम बॉम्ब आशिल्ल्याचें मत उक्तायलें. सरकार हें धोरण हाडपाक अपेशी थारिल्ल्याचो आरोप तांणी केलो.
सुवात मेळपाक अडचण: बाबूश मोंसेरात
घनकोयर वेवस्थापन मंत्री बाबूश मोंसेरात हांणी सांगलें, गोंय घनकोयर वेवस्थापन म्हामंडळ आनी जीआयडीसी कडल्यान कावलां अड्ड्यां खातीर सुवात सोदपाचें काम सुरू आसा. पूण सद्या योग्य सुवात मेळपाक कठीण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
