भांगरभूंय | प्रतिनिधी
गोंय मुख्याध्यापक संघटनेच्या प्रस्तावाचेर चल्ला विचार
भांगरभूंय । प्रतिनिधी
पणजी : गोंय मुख्याध्यापक संघटनेचे सुचोवणे उपरांत 2027- 2028 सावन शिक्षणीक वर्स पयली भशेन जून सावन सुरू करपाचो प्रस्ताव विचाराधीन आसा. संबंदितां कडेन बसका जाले उपरांत हो प्रस्ताव सरकाराक सादर जातलो. सरकार निमाणो निर्णय घेतलें, अशी माहिती शिक्षण संचालक शैलेश झिंगडे हांणी दिली.
तापमान तशेंच हेर कारणांक लागून एप्रीलांत वर्गांत विद्यार्थ्यांची उपस्थिती सामकी उणी आसता, अशी समस्या मुख्याध्यापक संघटनेन मांडल्या. हाका लागून ह्या प्रस्तावाचेर विचार सुरू आसा. राष्ट्रीय शिक्षण धोरणाचे कार्यवाहीक लागून 2025- 26 सावन एप्रीलांत वर्ग घेवपाचो निर्णय जाल्लो. एनईपी प्रमाण शिक्षणीक वर्सात थारावीक वरांचे वर्ग पुराय जावपाक जाय. जूनांत वर्ग सुरू जाले जाल्यार शिक्षणीक वर्साच्या वेळापत्रकाची फेरआंखणी करची पडटली, अशें शिक्षण संचालक शैलेश झिंगडे हांणी सांगलें.
राष्ट्रीय शिक्षण धोरणाचे कार्यवाही खातीर ब्रीज अभ्यासक्रम सुरू करपाची गरज आशिल्ली. एप्रीलांत वर्गात ब्रीज अभ्यासक्रम पुराय जातालो. जून सावन शिक्षणीक वर्स सुरू करपाच्या प्रस्तावाचेर विचारविनिमय चालू आसा. शिक्षणीक वरां कशीं पुराय करचीं, हाचो विचार करून निर्णय जातलो, अशें राज्य शिक्षण संशोधन आनी प्रशिक्षण मंडळाची संचालक मेघना शेटगांवकार हांणी सांगलें. एप्रील सावन वर्ग सुरू करपाच्या निर्णयाक पयलीं कांय पालकांनी लेगीत विरोध केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
