भांगरभूंय | प्रतिनिधी
भावंडांनो,
भावंडांनो, सुटयेचे दीस कशे वतात तेंच कळना न्हय? तुमी तर सगळींच कसल्या ना कसल्या वावरांत, खेळांत, कलेंत, शिकवणेंत भरसून गेल्यांत. गुंथून उरल्यांत. खूब बरी गजाल. भावंडांनो, तुमी तुमकां मेळिल्ले हे सुटयेचो वापर बऱ्या खातीर करतात तें पळोवन बरें दिसता. देखून तुमकां दोन उतरां सांगचीं अशें दिसता.
भावंडांनो, कांय भुरगीं आपल्या पालकांचें आपल्या काका- काकीचें आनी व्हडल्यांचें आयकनात. तशें करून उपकारना. ल्हान भुरग्यांनी सगळ्यांचें आयकूंक जाय. आपल्या व्हडल्या लोकांक सांगले शिवाय खंयच वचूंक जायना. उदकाच्या सुवातांनी म्हणल्यार वझरे, तळयो, बांयचेर, न्हंयचेर वा दर्यादेगांनी व्हडल्यां बगर वचूंक जायना. उदकाचो थाव ल्हान भुरग्यांक कळना. ते खातीर एकटीं उदकांत वचप ही भिरांतेची आनी धोक्याची गजाल थारूं येता.
हांव हें तुमकां कित्याक परतून परतून सांगतां आनी शिटकायतां तें जाणांत न्हय? फाटल्या दिसांनी घसघशार तशेंच न्हंयचेर गेल्ल्या भावंडांचेर कशेतरेन संकश्ट आयलां तें वाचलां न्हय तुमी खबरांपत्रांनी? गोंयांत तीन चार घडणुको घडल्यात, जातूंत निश्पाप भावंडांचो बळी गेला. अशा घडणुकांची याद दवरून आपल्या आवय बापायचें आयकयात.
भावंडांनो, तुमी घरांतल्यान भायर सरलीं म्हणटकच, परत घरा येमेरेन पालकांक हुस्को आसता. आमची एक चूक आमच्या कुटुंबाक खूब दुख्ख दिवंक शकता. ते खातीर आमी धोको आशिल्लें कसलेंच पावल मारूंक जायना. याद उरतली न्हय तुमकां.
दुसरें एक म्हत्वाचें सांगपाचें म्हणल्यार आनीक पंद्रशेन तुमचें स्कूल सुरू जातलें. तुमी सगळ्यांनी तुमच्या नव्या वर्गाचीं पुस्तकां हाडल्यांत आसतलीं. तीं तुमी वाचून पळयल्यार तुमकां तुमचे शिक्षक शिकयतना कितेंय दुबाव आसल्यार विचारपाक बऱ्याक पडटलें. तशेंच आपल्याक हो विशय कळटा हाचो आत्मविस्वास वाडटलो आनी परिक्षेक ताचो खूब फायदो जातलो. फाटलो म्हयनो देड म्हयनो तुमी खूब मजा केली. उरिल्ल्या दिसांनीय मजा करात, पूण नव्या वर्गाचीं पुस्तकां हाडल्यांत ताचेर नदर मारात. तुमकां खूब येस मेळटलें. तुमकां येस मेळ्ळ्यार तुमचे पालक आनी सोयरीं खूब खोशी जातलीं. आयकतलीं न्हय तुमी म्हजें? बरें तर… उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
