भांगरभूंय | प्रतिनिधी
फुडल्या पांच वर्सांत जागतीक उश्णताय नवे उंचायेर पावतली. तापमान 1.5 अंश सेल्सियस वाडपाची मर्यादा मोडूं शकता. संवसारीक हवामान संघटनेच्या अदमासा प्रमाण 2023 ते 2027 ह्या पांच वर्सां मदल्या एका वर्सा संवसारीक तापमान 1.5 अंश सेल्सियस वा ताचे परस चड वाडपाची शक्यताय 66 टक्के आसा.
हवामान संघटनेन संवसारीक उश्णतायेचेर केल्ल्या अभ्यासा उपरांत ही म्हायती जाहीर केल्या. पॅरिस करारात उश्णताय 1.5 अंश सेल्सियस इतली पातळी कायमची राखतलें, अशें म्हणलां. मात ह्या अहवालांत तशें सांगिल्लें ना. तात्पुरत्या काळा खातीर 1.5 अंश सेल्सियसाची पातळी मोडटली अशी शिटकावणी संवसारीक हवामान संघटना दिता. फुडल्या कांय म्हयन्यांत तयार जावपी अल निनोक लागून हवामानांतल्या मनशान तयार केल्ल्या बदला सारक्या घटकांक लागून संवसारीक उश्णताय वाडटली. पर्यावरण, भलायकी, अन्न सुरक्षा, उदक वेवस्थापन हांचेर ताचो वायट परिणाम जावंक शकता. ताचे खातीर तयार रावप गरजेचें अशें सांगलां.
फाटल्या 2022 वर्सा संवसारीक सरासरी तापमान 1850 ते 1900 मेरेनच्या उद्देगीक काळा पयलींच्या सरासरी परस 1.15 अंश सेल्सियस चड आशिल्लें. एल निनो तयार जाले उपरांत ताच्या फुडल्या वर्सा संवसारीक उश्णताय वाडटा. देखून 2024 वर्सा संवसारीक तापमान वाडपाची शक्यताय आसा. 2016 वर्सा एल निनोन केल्लो तापमान विक्रम फुडल्या पांच वर्सांत मोडपाची शक्यताय 98 टक्के आसा, अशें अहवालांत म्हणलां.
2018 ते 2022 ह्या सगळ्यांत उश्ण काळांत नोंद जाल्ल्या तापमाना परस फुडल्या पांच वर्सांत तापमान चड आसतलें. 2023 ते 2027 मेरेनचो पांच वर्सांचो काळ आतां मेरेनचो सगळ्यांत उश्ण आसूं येता, असोय उल्लेख ह्या अहवालांत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
