भांगरभूंय | प्रतिनिधी
मडगांव, प्रतिनिधी ः बोरी पुला खातीर जुवारी न्हंये सयत जमीन संपादनाची प्रक्रिया चालू आसा. जे जमनींतल्यान 5.73 किलोमिटर लांबायेचो बोरी पुल उबारतलें त्यो निश्चित केल्यात आनी ते संबंदी अधिसुचोवणीय जारी केल्या. ही प्रक्रिया पुराय जाल्ल्यान आतां न्यायालयांतल्यान स्थगिती लेगीत ताका लागू जावंची ना.
केंद्रीय रस्तो येरादारी आनी म्हामार्ग मंत्रालयान अधिसुचोवणी जारी केल्या उपरांत केंद्रीय मंत्री नितीन गडकरी हांणी ह्या कामाक चालना दिली. सादारणपणान दोन वर्सांच्या काळांत काम पुराय करपाचे यत्न करतात. फुडल्या दोन ते तीन वर्सां भितर नवो बोरी पूल तयार जातलो अशी म्हायती मंत्री सुभाष शिरोडकार हांणी दिली.
लोकांचो विरोध जावपाची शक्यताय…
मजगतीं, लोटलीच्या थळाव्या शेतकारांनी बोरी पुला खातीर खाजन जमनींतल्यान रस्त्याचें काम करचें न्हय अशी मागणी केल्ली. शेतकी जमनींतल्यान बोरी पूल बांदलो जाल्यार शेतकारांच्या पोट भरपाचें साधन नश्ट जातलें. तशेंच गांवाचें कायमचें लुकसाण जातलें अशें ह्या जाग्याच्या शेतकारांचें मत आशिल्लें. आतां जमीन संपादना खातीर अधिसुचोवणी जारी जाल्ल्यान लोटली वाठारांतल्या शेतकारांचो परतून विरोध जावपाची शक्यताय आसा.
बोरी, लोटली कोमुनिदादची सुवात वतली
केंद्रीय रस्तो येरादारी आनी म्हामार्ग मंत्रालयान बोरी पूल बांदपा खातीर अधिसुचोवणी जारी केल्या. हे अधिसुचोवणेंत भात शेत जमीन, फळ बागांची जमीन, ऑर्चर्ड जमीन हांचो आस्पाव जाता. संपादीत करपाची चडशी जमीन भाताची लागवड, तशेंच बोरी आनी लोटली कोमुनिदादींच्या ताब्यातली आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
