भांगरभूंय | प्रतिनिधी
समारोप सुवाळ्याक केंद्रीय मंत्री भूपेंद्र यादव आसतले हाजीर
पणजीः राज्यांतल्या सगल्या महसूल गांवांचो सर्वेक्षण सरकार करतलें. प्लास्टीक, कोयर मुक्त आनी हेर नितळसाण निकश पाळपी गांवाक व्हड रोख रकमेचे पुरस्कार दितले. 19 डिसेंबराक जावपी कार्यावळींत हो पुरस्कार भेटयतले अशी घोशणा मुख्यमंत्री डॉ. प्रमोद सावंत हांणी केली. शेनवारा तांणी राज्यांतल्या पंच, सरपंच आनी स्वयंपूर्ण इश्टां कडेन ऑनलायन संवाद सादलो. ह्या वेळार तांणी राज्य सरकारान सुरू केल्ल्या हरित गोवा, नितळ गोंय उपक्रमाची म्हायती दिली.
गोंयांतल्या रस्त्यांच्या कुशीक हरित कॉरिडॉर तयार करपाचो आमी यत्न करतात अशें मुख्यमंत्र्यान सांगलें. हे खातीर पत्रादेवी ते पोळें मेरेनच्या राष्ट्रीय म्हामार्गाचेर झाडां लायतले.
फुडल्या तीन म्हयन्यांत 10 लाख झाडां रोयतले. रस्त्या कुशीक शेती करप्यांनी आपल्या शेतांत झाडां लावचीं. ह्या झाडांची मालकी पुराय शेतकाराची आसतली. पंचायत, नगरपालिका, शाळा, म्हाविद्यालयांनी आपल्या आवारांत झाडां रोवपाची मोहीम सुरु करची. भौशीक बांदकाम, शेतकी, आनी रान खात्यांतले अधिकारी हातूंत मजत करतले.
झाडां रोयल्या उपरांत तांची देखरेख आनी तांकां उदक घालपाचे काम सरकार करतलें. बायला बचत गटांनी हें काम हातांत घेतल्यार तांकां पगार मेळटलो. तीन म्हयन्यां उपरांत ह्या उपक्रमांत बरी कामगिरी करपी पंचायत आनी हेर संस्थांक इनामां दितले. लोकांनी वड, पिंपळ, अर्जुन सारकिल्लीं झाडां लावचीं, तांचो आंकडो उणो जायत आसा. गोंय पाचवें करप ही सरकाराचीच जापसालदारकी न्हय तर सामुहीक जापसालदारकी आसा. हे खातीर लोकांचो सहभाग गरजेचो अशेंय तांणी सांगलें. कार्यावळीच्या निमाण्या सुवाळ्याक केंद्रीय मंत्री भूपेंद्र यादव हाजीर आसतले.
येवजणे खातीर अर्ज दिवचे
सगल्या पंचायतींनी म्हजे घर येवजणे खाला वेगवेगळे अर्ज दिवचे अशें मुख्यमंत्र्यान सांगलें. अर्ज भरपाक नागरिकांक मजत करची अशेंय तांणी सांगलें. सुमार 1 लाख गोंयकारांक हे येवजणेचो फायदो जातलो अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
