भांगरभूंय | प्रतिनिधी
माणिकराव : 18 जूनाक विवीध उपक्रमांची घोशणा
भांगरभूंय । प्रतिनिधी
पणजी : फुडले पंद्रशेंत गोंय प्रदेश काँग्रेसीच्या विवीध समित्यांची स्थापना करतले. समितींत नवे, आदले कार्यकर्ते आसतले. 18 जूनाक पक्षा वतीन जावपी क्रांती दिसाचे कार्यावळींत विधानसभा वेंचणुके खातीर विवीध उपक्रमांची घोशणा करतले, अशें गोंय प्रभारी माणिकराव ठाकरे हांणी सांगलें.
शेनवारा पणजे जाल्ले बसके उपरांत ठाकरे हांणी माध्यमां कडेन संवाद सादलो. ह्या वेळार सह प्रभारी अंजली निंबाळकर, प्रदेशाध्यक्ष गिरीश चोडणकार, विरोधी पक्ष फुडारी युरी आलेमांव आनी हेर पदाधिकारी उपस्थीत आशिल्ले.
ठाकरे हांणी सांगलें, नव्या समित्यांची नेमणीक जाले उपरांत सगल्या मतदारसंघांत कामांक गती येतली. गोंयांतले लोक भाजपाक विटल्यात. लोकांक बदल जाय. ते नदरेन आमी लोकांचे विचार लक्षांत घेवनूच विवीध उपक्रम चालीक लायतले. प्रदेश अध्यक्ष बदलपाचो निर्णय काँग्रेस हायकमांडाचो आसा. हाका लागून कांय जाण बेजार आसूं येतात. मात खरो काँग्रेस कार्यकर्तो आपले नाराजीक लागून पक्षाचें लुकसाण करिना. आमी लेगीत कोणाचेंच लुकसाण करचे ना. पक्ष कोणा एकल्याचो आसना. आमी गोंयच्या हिता खातीर सगल्यांक एकठांय घेवन फुडे वतले, अशें तांणी सांगलें. अंजली निंबाळकर हांणी सांगलें, प्रदेशाध्यक्ष बदलचे आदीं गोंयांतल्या सगल्या आमदारांची आनी पदाधिकाऱ्यांची मतां लक्षांत घेतल्यांत. सगल्यांक दिल्लींत आपोवन तांचे कडेन प्रत्यक्ष उलोवणी जाले उपरांतूच हो निर्णय घेतला. मात पक्षान होच निर्णय कित्याक घेतलो, हाचे विशीं आमी कांयच सांगपाक शकनात. हेर राज्यांनी लेगीत अशे निर्णय घेतल्यात. हायकमांडाचें स्वताचें लेगीत सर्वेक्षण आसता. आमी पक्षाचे कार्यकर्ते आसात. पक्ष जो निर्णय घेतलो, तो सगल्यांनी मान्य करपाक जाय, अशें तांणी सांगलें.
लोबो जोडप्याक घेवप ही चूक : चोडणकार
लोबो जोडप्याक पक्षांत घेवन तांकां तिकेट दिवप ही आमची चूक जाली. हाचे मुखार पक्षांतर करप्यांत पक्षांत प्रवेश मेळचो ना. आमी फुडले कांय दीस पक्ष संघटना अदीक घटमूट करपाचे आसात. जिल्हो, राज्य आनी हेर समित्यांची पुनर्रचना करतले, अशें गिरीश चोडणकार हांणी सांगलें.
पक्षाचो निर्णय मान्य : युरी आलेमांव
पक्षान घेतिल्लो निर्णय आमी मान्य केला. आमचे खातीर पक्ष सगल्यांत पयलीं. आमी सगळे एकवटान भ्रश्ट जुमला पार्टीक सत्ते वयल्यान काडटले, अशें युरी आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
