भांगरभूंय | प्रतिनिधी
सुभाष शिरोडकारः पेडणेंच्या कोसळिल्ल्या प्रशासनाची दखल
भांगरभूंय । प्रतिनिधी
पेडणें: पेडणें म्हालांत प्रशासन कोसळ्ळां हें लक्षांत आयले उपरांत फुडले खेपे मुख्यमंत्री डॉ. प्रमोद सावंत हांकांच प्रशासन तुमच्या दारांत उपक्रमांत आपयतले, अशें शिंपणावळ मंत्री सुभाष शिरोडकार हांणी सांगलें. प्रशासनान आपले पद्दतीन लोकांच्यो समस्या समजून घेवन त्यो सोडोवच्यो आनी लोकांनी तांकां आदार करचो, असो उलोय तांणी मारलो.
विर्नोडेंच्या संत सोयरोबानाथ आंबिये म्हाविद्यालयाच्या सभाघरांत प्रशासन तुमच्या दारांत उपक्रम आयोजीत केल्लो. ह्या उपक्रमांत लोकांच्यो समस्या, गाराणीं आयकून घेतले उपरांत मंत्री शिरोडकार उलयताले. ह्या वेळार तांचे वांगडा पेडणें मतदारसंघाचे आमदार प्रवीण आर्लेकार, मांद्रें मतदारसंघाचे आमदार जीत आरोलकार, आदले आमदार दयानंद सोपटे, पेडणेंचे नगराध्यक्ष माधव सिनाय देसाय, सरकारी अधिकारी दशरथ रेडकार, पेडणेंचे उपजिल्होधिकारी दीपक वायंगणकार, पेडणेंचे मामलेदार आनंद मळीक, पेडणें गटविकास अधिकारी पवार, कोरगांवचे जिल्हो पंचायत वांगडी रंगनाथ कलशांवकार, मोरजी जिल्हो पंचायत वांगडी सतीश शेटकार, धारगळ जिल्हो पंचायत वांगडी मनोहर धारगळकार, तोरशें जिल्हो पंचायत वांगडी सीमा खडपे आनी हेर मानेस्त हाजीर आशिल्ले.
वीज, उदक, गटार वेवस्था, हुमकळपी वीज सरयो, मोपा विमानतळा खातीर जांच्यो जमनी गेल्यात तांकां योग्य मोबदलो, भुंयपुतां खातीर टॅक्सी वेवसायीक कावंटर, कितलीशींच वर्सां पडून आशिल्ले मामलेदार, उपजिल्होधिकारी, न्यायालयांतले खटले मार्गाक लावचे, वेवस्थीक उदका पुरवण करची, फोंडकुलांनी भरील्ले आनी धुल्लान प्रदुशीत जाल्ले रस्ते पावसा आदीं दुरुस्त करचे, अशी मागणी लोकांनी तशेंच सरपंचांनी ह्या वेळार मंत्री शिरोडकार हांचे कडेन केली. ह्या सगळ्या विशयांचेर सगळ्या हाजीर आशिल्ल्या अधिकाऱ्यांनी आपलो अहवाल सोमार मेरेन सादर करचो आनी पांवड्या पांवड्यान हे विशय प्रशासन तुमच्या दारांत वरवीं सोडयतले, असो भरवसो मंत्री शिरोडकार हांणी दिलो.
प्रशासन सुस्तेलां, अधिकारी काम करिनात असो आरोप कांय नागरिकांनी केलो. त्या वेळार मंत्री शिरोडकार हांणी सांगलें, जर प्रशासनांतले अधिकारी कामचुकारपणा करतात जाल्यार तांचेर लेगीत योग्य ती कारवाय जातली. दरेका अधिकाऱ्यान लोकांचे प्रस्न समजून घेवन ते सुटावे करपाचे यत्न करपाक जाय. मोपा विमानतळ प्रकल्पाचो थळाव्या लोकांक दिवपाचे नदरेन म्हालांतल्या दोनूय आमदारांनी यत्न करपाक जाय. प्लॅनींग मॅप तयार करून तो सरकाराक सादर करचो, अशें तांणी सांगलें.
आमदार प्रवीण आर्लेकार हांणी सांगलें, मोपा विमानतळाक लागून थळाव्यांक रोजगार मेळटलो. खूपशे तरेच्यो प्रशासन येवजण्यो लोकां मेरेन पावोवपा खातीर स्वयंपूर्ण मित्रांची सरकारान निवड केल्या. तांची पंचायत मंडळा वांगडा आपूण बसका घेतलों आनी सगळ्या येवजण्यांचो लाव लोकांक दिवचे खातीर यत्न करतलों.
जीत आरोलकार हांणी सांगलें, ज्या प्रमाणांत उदकाची समस्या पुराय म्हालांत आसा, तीं आतांच उप्रासूंक ना. ही समस्या सुटावी करचे खातीर नागरीक, पंचायत मंडळां आनी सरकाराचोय वेवस्थीत आदार मेळटा. ताका लागून ही समस्या फुडारांत सुटावी जातली. नवे उदकाचे प्रकल्प उबारले उपरांत ही समस्या सुटावी जातलीच, पूण ते आदीं कासारवर्णें बैलपार न्हंयेचेर आशिल्ल्या पंप हावसा वरवीं खारजांतल्यान कच्चें उदक तुयेंच्या नियोजीत उदक शुद्धीकरण प्रकल्पांत पावले उपरांत उदकाची समस्या सुटावी जातली. मांद्रें मतदारसंघांत सरकाराच्या आदारान 200 कोटी परस अदीक खर्चाची उदरगतीचीं कामां सुरू आसात, अशेंय तांणी सांगलें.
दयानंद सोपटे हांणी सांगलें, अधिकाऱ्यांक लोकांचो आदार वेळावेळार मेळ्ळो जाल्यार उदरगतींत कसलीच आडखळ येवची ना. फक्त टिका करून चलचें ना, सरकारी अधिकाऱ्यां कडल्यान लोकांनी आपलीं कामां करून घेवचीं, असोय तांणी ह्या वेळार उलो मारलो. तोरशेची सरपंच प्रार्थना मोटे, इब्रामपूरचे सरपंच अशोक धावुस्कार, तोरशेचे आदले सरपंच सूर्यकांत तोरस्कार, तुयेंचे सरपंच उदय मांद्रेंकार, विर्नोडाचे आदले सरपंच प्रदीप परब हांणीय आपल्या वाठारांतल्यो समस्या मांडल्यो.
कातकरी समाजाक घरां दियातः प्रवीण आर्लेकार
कातकरी समाज मालप्यां कितल्याशाच वर्सां सावन रावता. तांकां घरांची वेवस्था करून दिवची अशी मागणी आमदार प्रवीण आर्लेकार हांणी केली. त्या वेळार मंत्री सुभा। शिरोडकार हांणी पेडणेंचे उपजिल्होधिकारी दीपक वायंगणकार, मामलेदार अनंत मळीक हांकां सुचोवण्यो करून तांकां कशे तरेन घरां दिवपाक मेळटली, ताचो अहवाल दिवपाची सुचोवणी केली.
उपक्रमाची अंमलबजावणी योग्य तरेन जावचीः तळावणेंकार
प्रशासन तुमच्या दारांत उपक्रमाची अंमलबजावणी योग्य तरेन जावची. ओबीसीचें प्रमाणपत्र दितना तलाठी व्हड प्रमाणांत आडखळी निर्माण करता. ताचेर सरकारान नियंत्रण दवरपाक जाय. जातीचें प्रमाणपत्र दितना लोकांक कसलोच त्रास जावपाक जायना, अशी मागणी पेडणें भोवजन समाजाचे फुडारी उमेश तळावणेंकार हांणी केली. ताचेर मंत्री सुभाष शिरोडकार हांणी सांगलें, आपूण ताकतिकन भंडारी समाजाचे अध्यक्ष अशोक नायक हांचे वांगडा बसका घेता. तुवूय ताका हाजीर राव. ताचेर योग्य निर्णय घेवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
