भांगरभूंय | प्रतिनिधी
पणजीः गोंयांत फुटबॉलाचो दर्जो देंवत चल्ला. हो दर्जो वाडोवन तो पयली भशेन वयर व्हरपा हेतान गोंय फुटबॉल उदरगत म्हामंडळ आनी गोंय फुटबॉल संघटणा गोंय फुटबॉल परिशद घडोवन हाडटली. हे परिशदेंत नामानेचे फुटबॉल खेळगडे आनी ह्या मळार वावुरपी म्हालगडे वांटेकार जातले. तांणी दिल्ल्या सुचोवण्यांची सरकार रोखडेंच अंमलबजावणी करतलें अशी म्हायती खेळां मंत्री गोविंद गावडे हांणी दिली.
गोंय फुटबॉल परिशदे विशीं म्हायती दिवपा खातीर कला अकादमींत सोमारा पत्रकार परिशद आयोजीत केल्ली. ह्या वेळार मंत्री गावडे हांचे वांगडा परिशदेचे अध्यक्ष आनी मडगांवचे आमदार दिगंबर कामत, खेळां संचालक गीता नागवेंकार, जिएफचे अध्यक्ष कायतान फर्नांडीस, पद्मश्री ब्रम्हानंद शंखवाळकार आनी हेर पदाधिकारी हाजीर आशिल्ले. मंत्री गावडे हांचे हस्तुकीं ह्या वेळार हे परिशदेच्या लोगोचें उक्तावण जालें.
2012 उपरांत फुटबॉल हो राज्य खेळ म्हूण जाहीर जाले उपरांत आयज ह्या खेळाची स्थिती निरशेवणी आनी हुस्क्याची जाल्या. 2004-2005 उपरांत संतोष ट्रोफीचें जैत आमकां मुकलां. देखून फुटबॉल हो खेळ विकसीत करपाक चर्चासत्र घडोवन हाडपा खातीर ही परिशद घडोवन हाडटले, अशें गावडे हांणी सांगलें.
अॉक्टोबर 9 ते 10 मजगतीं ही दोन दिसांची परिशद बिपीएस स्पोर्ट्स क्लब मडगांवां जातली. हे परिशदेचें उक्तावण जावन पॅनल चर्चेक सुरवात जातली. फुटबॉल भागधारकांक येवपी अडचणींचो सोद घेवन देंवत चलिल्ल्या राज्य खेळ फुटबॉलाच्या दर्ज्याक नवी संजिवनी दिवपाक गरेजेच्यो सुचोवण्यो करप हाे मुखेल उद्देश आसतलो अशी म्हायती गावडे हांणी दिली.
पयल्या दिसा कॉचींग, वेवसायीक क्लब, हौशी क्लब, खेळगड्यांचो दृश्टीकोन, गांवांतल्यो फुटबॉल सर्ती, ग्रासरूट, तरणाटे फुटबॉल आनी अकादमी, सुविधा, मार्केटींग, स्पोन्सरशीप आनी फॅन एन्गॅजमेंट ह्या विशयांचेर वर भर चर्चा जातली. दुसऱ्या दिसा पॅनलिस्टांनी जे मुद्दे मांडल्यात ताजे प्रेजेन्टेशन जातलें आनी गोंयच्या फुटबॉला खातीर खंयच्यो बऱ्यो गजाली आसात ताचें ठोस समाधान जीएफडीसी आनी जिएफएक सुचयतले अशें गावडे हांणी सांगलें.
भुरगो जेन्ना जल्माक येता तेन्ना तो पयली फुटबॉल खेळटा आनी हे सारिकिल्ली परिशद फुटबॉलाचो दर्जो सुदरावपाक आयोजीत करप ही बरी गजाल, अशें परिशदेचे अध्यक्ष दिगंबर कामत हांणी म्हणलें.
2012 त जीएफडीसीची स्थापन जाली. पूण फुडें वचून फुटबॉलाची उदरगत जावंक ना. फुटबॉलाक वालोर नाशिल्लीं हेर राज्यां आतां फुटबॉलाचे बाबतींत खूब मुखार गेल्यांत. फुटबॉलाक पयलींची गिरेस्तकाय दिवपा खातीर बरी गजाल हातांत घेतल्या. मंत्री गावडे हे परिशदेचे पॅट्रन आशिल्ल्या कारणान सरकार ह्या सुचोवण्यांची बेगोबेग अंमलबजावणी करतलें अशी आस्त कामत हांणी उक्तायली.
जीएफडीसी आनी जिएफएक बरोबर घेवन पयलेच खेपे एक बरो उपक्रम हातांत घेतले. फाटलीं 10 वर्सा दोनूय संघटणे मदीं मात्शे अंतर पडलें. पूण आतां जीएफडीसी ग्रासरूट खेळगड्यांक तयार करतले आनी आमी तांकां फुडल्या पांवड्यार मुखार व्हरतले. ह्या मळार उणाव आसा ताचेर चर्चा करून आमी भुरगे खेळगड्यांक मार्गदर्शन करतले, अशे जीएफएचे अध्यक्ष कायतान फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
