फिल्मी खबरो

भांगरभूंय | प्रतिनिधी

आयज तुमचें भेटेक ‘भैया जी’

फाटल्या 3 दसकां सावन बॉलीवूड फिल्म इंडस्ट्रींत आपल्या जबरदस्त अभिनयान नांव जोडपी मनोज बाजपेयीचो ‘भैया जी’ चित्रपट आज तुमच्या भेटेक थेटरांनी येता. ह्या चित्रपटांत तो ‘भैया जी’ म्हूण दिसतलो. फाटलीं कांय वर्सां ओटीटीचेर गाजयल्या उपरांत मनोज आतां परत मोठ्या स्क्रिनीर ताच्या मोग्यांच्या भेटेक येता. फॅमिली मॅन सीरीजेंत ताका खूप प्रसिद्धी मेळ्ळी. फाटोफाट ‘सिर्फ एक बंधा काफी है’, ‘जोराम’, ‘किलर सूप’ अशी एका परस एक सरस फिल्मां ताणें ओटीटीचेर हाडलीं.
भैयाजींत ताचो वेगळो अॅक्शन अवतार पळोवपाक मेळटलो. दक्षीणी चित्रपटांकडेन ह्या चित्रपटाची तुळा जाता.

पयसो वसूल ‘श्रीकांत’

राजकुमार राव आनी ज्योथीका अभिनीत ‘श्रीकांत’ चित्रपट बॉक्स ऑफिसार नेट धरता. ह्या चित्रपटान आतांमेरेन 40 कोटींचो वेवसाय केला. तशेंच ह्या चित्रपटाचें बजेटूय 40 कोटीच आसा. तेन्ना ह्या चित्रपटान आपलो पयसो वसूल केलो अशें म्हणूं येता. चित्रपटाक लोकांचो मेळटा तो प्रतिसाद पळयल्यार फुडल्या कांय दिसांत 50 कोटी सहज पार जातलें अशें दिसता.
राजकुमार रावाचो पयश्यांचें हिशेबान सगळ्यांत चड वेवसाय करपी ‘श्रीकांत’ हो दुसरो चित्रपट थारलो. ह्यान पयलीं ताच्या ‘स्त्री’ चित्रपटान 129 कोटींचो वेवसाय केल्लो. तशेंच कंगना रणावता बरोबर ताचो आयिल्लो ‘जजमँटल है क्या’ चित्रपटान 33 कोटी 11 लाख रुपयांचो वेवसाय केल्लो.
श्रीकांत चित्रपटांतल्या भूमिके खातीर राजकुमार रावाची चोयवटेन तोखणाय जाता.

‘आवेशम’ देडशें कोटी पार

मल्याळम चित्रपटांची पटकथा बरी आसता म्हूण संवसारभर फामाद. तांचें एका फाटोफाट एक चित्रपट ग्लोबली हिट जावपाक लागल्यात. फहाद फासील अभिनीत आवेशम चित्रपटान वर्ल्डवायड 155 कोटींचो वेवसाय केला, आनी अजूनय थेटरांनी गर्दी ओडटा. 11 एप्रिलाक प्रदर्शीत जाल्ल्या आवेशम चित्रपटान भारतांत आतांमेरेन 84 कोटी 35 लाख रुपयांचो वेवसाय केला. खाशेली गजाल म्हणल्यार हो चित्रपट फकत 30 कोटी रुपयांन तयार जालां.
पुष्पा, विक्रम, बेंगलोर डेज सारखी हिट फिल्मांत म्हत्वाची भूमिका करपी फहादान आवेशमान हिरो म्हूण येस जोडलां. अॅक्शन कॉमेडी प्रकारातल्या ह्या चित्रपटांतली फहादाची भूमिका सगळ्यांक आवडल्या.

हॉरर कॉमेडी ‘अरणमनाई 4’चो धुमाकूळ

बॉक्स ऑफिसाचेर मोठे येस जोडून येसस्वी फ्रेंचायजी म्हूण फामाद जाल्ल्या अरणमनाई चित्रपटाचे चवथ्या भागान ‘अरणमनाई 4’ चित्रपटान बॉक्स ऑफिसाचेर धुमाकूळ घाला. मूळ तामीळ आशिल्ल्या ह्या चित्रत्रपटान संवसारभर 87 कोटींचो वेवसाय केला. 3 मेक हो चित्रपट प्रदर्शीत जाल्लो. आतांमेरेन भारतांत 57 कोटी जाल्यार विदेशांत 32 कोटींचो वेवसाय केला. ह्या फिल्मांत पयल्या 3 फिल्मांचो हिरो, अभिनेतो, लेखक, निर्मातो दिग्दर्शन सुंदर आसा. जाल्यार अभिनेत्री म्हूण अरणमनाई फ्रेंचायजींत तमन्ना भाटीया आनी राशी खन्ना हांचो आस्पाव जाला. सुंदरान आतां ह्या चित्रपटाचो पांचवो भाग काडपा खातीर तयारी सुरू केल्या.

अॅमेझॉनार ‘मैदान’

भारतीय बॉक्स ऑफिसार, तशेंच संवसारीक पांवड्यार आपटलेलो अजय देवगणाचो चित्रपट ‘मैदान’ अॅमेझॉनाचेर प्रदर्शीत जालो. अ‌ॅमेझॉनार हाडटना ह्या चित्रपटांत कांय बदल केल्यात, रोमांचक ट्विस्ट केला अशी म्हायती मेळ्ळ्या. ईदादिसा प्रदर्शीत जाल्ल्या भारतीय बॉक्स ऑफिसावेल्यान ह्या चित्रपटान 48.52 कोटी एकठांय केल्लें. संवसारीक पांवड्यार फकत 19.50 कोटी मेळ्ळें. ह्या चित्रपटाचो बजेट 235 कोटी रुपया आशिल्लो. बॉक्स ऑफिसार फ्लॉप जावपी फिल्मा ओटीटी प्लॅटफॉर्मांचेर चलतात, असो इतिहास आसा. अजय देवगणाक हो चित्रपट ओटीटीचेर चलत म्हूण आस्त.