फिल्मी खबरो

भांगरभूंय | प्रतिनिधी

अजय देवगण – तब्बूची लव्ह स्टोरी

अजय देवगण आनी – तब्बूची 24 वर्सांची लव्ह स्टोरी पळोवपाक 5 जुलय मेरेन वाट पळयात. ह्या दोगांयचे ‘औरो में कहाँ दम था’ हें फिल्म प्रदर्शीत जाता. काल ह्या फिल्माचो ट्रेलर रिलीज जालो आनी कांय वरांतूच सोशल मीडियाचेर ह्या ट्रेलराक बरोच प्रतिसाद मेळ्ळो. अजय, तब्बू बरोबरच ह्या फिल्मांत जिमी शेरगील, शंतनू आनी सई मांजरेकर आसात.
दृष्यम 1 आनी 2, तान्हाजी, भोला आनी शैतान ह्या फिल्मांक लागून अजय देवगण सुपर फॉर्मान आसा. जाल्यार भुलभुलैया 2, भोला, दृश्यम 2, क्रू, वैखुंडपुरम ह्या फिल्मांक लागून तब्बूय फॉर्मांत आसा. ह्या दोगांयची कॅमेस्ट्री प्रेक्षकांक खुपूच आवडटा. आनी होच ह्या नव्या फिल्मा खातीर प्लस पॉयंट आसा. फिल्मांत दोगांयमदी आशिल्लो मोग 24 वर्सां उपरांतूय तसोच आसा काय ह्या प्रस्नाची जाप 5 जुलायाकूच मेळपाची.

‘पुष्पा – 2’चो म्हूर्त चुकता…

अल्लू अर्जुन अभिनीत ‘पुष्पा – 2’ फिल्माचो म्हूर्त चुकपाची चिन्हां दिसपाक लागल्यात. कांय कारणांक लागून ह्या फिल्माचे सगलें काम थरावीक वेळेंत पुराय जावपाक शकना, अशी परिस्थिती निर्माण जाल्या. अल्लू अर्जुनान काम वेळेंत सोपोवपाची सुचोवणी केल्ली. मात, परिस्थिती आतां ताच्या हाताभायर वचपाक लागल्या.
‘पुष्पा’ फिल्मान धुमाकूळ घालतना पाचेकशे कोटी रुपया जोडिल्ले. ह्या येसाक लागून ‘पुष्पा – 2’ फिल्म काडपाचो निर्णय जालो. ते नदरेन शूटिंगूय पुराय जाली, मात कांय तंत्रीक गजालींक लागून हें फिल्म थारिल्ल्या दिसा प्रदर्शीत जावंक शकना. हें फिल्म 15 ऑगस्टाक प्रदर्शीत करपाचें थारिल्लें. मात, दिग्दर्शक सुकुमारा व्हीएफएक्स काम आवडूंक नाशिल्ल्यान तो आतां सगळे काम परत घेवन बसपाचो. तातूंतच कांय सीन परत शूट करपाचेंय थारला. पुष्पा 2 आतां चडकरून फुडल्या वर्साकूच येवपाचो.

अक्षय कुमार – जॉन अब्राहम परत एकामेका मुखार

‘सिंघम अगेन’ फाटोफाट ‘पुष्पा – 2’ फिल्म 15 ऑगस्टाक प्रदर्शीत जायना म्हूण लागीलागीं स्पश्ट जाल्या उपरांत जॉन अब्राहमाच्या ‘वेदा’ फिल्माक कसलीच सर्त आसची ना म्हूण दिसताले. मात, आतां दोन व्हड फिल्मा फुडे गेल्ल्यान 15 ऑगस्टाच्या स्लॉटांत नवी फिल्मां येवपाक लागल्यात. तातूंतच अक्षय कुमार हांच्या ‘खेल खेल मे’ फिल्माचो आसपाव आसा. आतां 15 ऑगस्टाक जॉन अब्राहम आड अक्षय कुमार अशी झूज पळोवपाक मेळटली.

ह्या आदीं अक्षय आनी जॉन हांची दोन फावट एकाच दिसा फिल्मां आयिल्लीं. 15 ऑगस्ट 2018चो म्हूर्त सादून जॉनाचो सत्यमेव जयते आनी अक्षय कुमाराचो गोल्ड फिल्म आयिल्लें. दोनूय फिल्मां बरेपैकी चलिल्ली. तशेंच 15 ऑगस्ट 2019चो म्हूर्त सादून जॉनाचो बाटला हावज आनी अक्षयाचो मिशन मंगल आयिल्लो, हीं फिल्माय हिट जाल्ली. ह्या फावट दोगांयच्या फिल्मांचो कितें निकाल लागतलो, हाची आतां सगल्यांकूच उमळशीक आसा.
जॉन अब्राहमाच्या वेदा फिल्मांत शर्वरी, तमन्ना भाटिया, क्षीतीज चव्हाण, अभिशेक बॅनर्जी आसात. जाल्यार अक्षय कुमाराच्या खेल खेल मे फिल्मांत फरदीन खान, तापसी पन्नू, वाणी कपूर आसात.

प्रेक्षकांचेर ‘मुंज्या’ची दहशत

कोंकणातले भुताटकेचेर आधारित फिल्म ‘मुंज्या’ची प्रेक्षकांचेर बरीच दहशत बसल्या. हॉरर फिल्म मोगी, तशेंच नव्या प्रेक्षकांची ह्या फिल्माचेर उडयो पडपाक लागल्यात. पंचविसेक कोटी रुपयांत तयार जाल्ल्या ह्या फिल्मान पयल्या सप्तकांत 41 कोटी रुपया जोडल्यात. ह्या फिल्मांत शर्वरी, अभय वर्मा, मोना सिंह, सत्यराज हांच्यो मुखेल भूमिका आसात. ह्या फिल्माची घोडदौड पळयल्यार दुसरो भागूय बेगीनूच येवपाक शकता.