फिल्मी खबरो

भांगरभूंय | प्रतिनिधी

‘पुष्पा – 2’च्या ‘सुसेकी’ गीताचो धुमाकूळ

लोक उमळशीकेन वाट पळयतात अश्या फिल्मांनी ‘पुष्पा – 2’चो आस्पाव आसा. हें फिल्म येताच लोकांच्यो थेटरांनी उडयो पडटल्यो हातूंत दुबाव ना. मात, तें पयली पुष्पा वाले एक – एक करून गीतां भायर काडून लोकांमदीं उमळशीक वाडोवपाचे काम करता.
ह्या फिल्माचें सुसेकी गीताचे लिरिक्स बुधवारा रिलीज जाले. लिरिक्सा बरोबरच गीताचे व्हिडियो मेकिंगा वेळारच्यो क्लीपांय जोडल्यात. ह्या व्हिडियो-लिरिकल गीतान सोशल मीडियाचेर खुपूच धुमाकूळ घाला. खऱ्यानीच ‘पुष्पा झुकेगा नही, बिकेगा’.

‘मिस्टर अँड मिसेस माही’ तुमच्या भेटेक

‘श्रीकांत’ फिल्माच्या येसा उपरांत राजकुमार राव आतां प्रेक्षकांच्या भेटेक ‘मिस्टर अँड मिसेस माही’ फिल्म घेवन आयला. ह्या फिल्मांत ताच्या बरोबर जान्हवी कपूर आसा. हें फिल्म क्रिकेटर महेंद्र सिंग धोनी हांकां समर्पीत आसा. ह्या फिल्मांत बायलां क्रिकेट दाखयला. तशेंच कलाकार वेंचतना क्रिकेटर आशिल्ल्यांक प्राधान्य दिला. क्रिकेटाचेर आधारित हें फिल्म लोकांक निश्चीतच आवडटले, असो विस्वास राजकुमार राव हांणें उक्तायला.

गॉडजिलाची भारतांत ‘शंबरी’

हॉलीवूड फिल्मां भारतांत बरेंपैकी पयशें जोडटात. फाटल्या कांय वर्सांत भारतांत शंबर कोटी मायज कलॅक्शन करपी जायतीं फिल्मां आसात. तातूंत आतां गॉडजिला सीरिजांतल्या नव्या फिल्माचो आस्पाव जाला. ‘गॉडजिला वर्सीस कॉंग : द न्यू एम्पायर’ ह्या फिल्मान भारतांत 101 कोटी मायज वेवसाय केलो. ह्या गॉडजीलाक लागून बॉलीवूड, टॉलीवूडाच्या फिल्मांच्या कलॅक्शनाक बरोच मार बसला.

‘टिल्लू स्क्वॅर’ सरप्रायज ब्लॉकबस्ट

खंयचें फिल्म चलत हें कोणाच्यानूच सांगूं नजं. बीग बजेट फिल्मां धाडाम् करून आदळटात. निर्मात्यांक मोठे लुकसाण जाता, जाल्यार कांय कमी बजेटाची फिल्मां चलतात. तामीळ फिल्म ‘टिल्लू स्क्वॅर’ अंदूचो सरप्रायज ब्लॉकबस्टर फिल्म थारलें. 40 कोटींत तयार जाल्ल्या ह्या फिल्मान 135 कोटी जोडलें.
ह्या फिल्मांत सिद्धी जोनालगड्डा हो नवो हिरो आसा, जाल्यार बॉलीवूड अभिनेत्री अनुपमा परमेश्वरन हिरोईन आसा. सस्पेन्स कॉमेडी प्रकारांतल्या ह्या फिल्माक टॉलीवूडा बरोबरच बॉलीवूड वाल्यां कडच्यानूय बरो प्रतिसाद मेळत आसा.

अटली – वरुण धवनाचो ‘बेबी जॉन’ फुडें धुकल्लो

अटली म्हणल्यार फिल्म चलतलेंच, प्रेक्षकांच्यो उडयो पडटल्योच म्हूण निश्चीत. वरुण धवन अभीनीत, अटली दिग्दर्शीत ‘बेबी जॉन’ फिल्म कांय कारणांक लागून फुडें धुकल्ला. जवान सारखो हिट फिल्म दिवन अटलीन बॉलीवूडांत दमदार पदार्पण केल्लें. आतां ‘बेबी जॉन’ वरुण धवना बरोबर तो बॉलीवूडांत परत येता. बेबी जॉन फिल्माचे कथानक अटलीच्याच थेरी फिल्माचेर आधारित आसा.