भांगरभूंय | प्रतिनिधी
येजमान बांगलादेश आनी न्युझिलॅण्ड ह्या पंगडां मदली दुसरी आनी निमाणी टॅस्ट मॅच उमळशीक वाडोवपी स्थितींत पावल्या. न्युझिलॅण्डाच्या ग्लॅन फिलिप्सान 72 बॉलांनी 87 धांवड्यांची आक्रमक बॅटींग केली. ताचे बॅटिंगेक लागून न्युझिलॅण्डान बांगलादेशा आड आठ धांवड्यांची नांवा पुरती आघाडी घेतल्या उपरांत बांगलादेशाच्या दुसऱ्या डावांत दोन विकेटी घेतल्यो.
पावसान आडखळ हाडिल्ले मॅचींत बांगलादेशान पयल्या डावांत 172 धांवड्यो केल्ल्यो, जाल्यार न्युझिलॅण्डाचो पयलो डाव 180चेर सोंपलो. पावसाक लागून दुसऱ्या दिसा एकूय बॉल घालपाक मेळ्ळो ना.
उण्या उजवाडाक लागून खेळ बेगीन थांबोवचो पडलो. खेळ थांबलो त्या वेळार बांगलादेशान 2 विकेटी वगडावन 38 धांवड्यो केल्यात. सध्या बांगलादेश 30 धांवड्यांनी मुखार आसा आनी ताच्यो आठ विकेटी बाकी आसात.
न्युझिलॅण्डान 5 बाद 55 धांवड्यां वयल्यान मुखार खेळपाक सुरवात केली. फिलिप्सान मर्यादीत ओव्हरीचे क्रिकेटींतले शैलींत बॅटींग केली. ताणें चार चवके आनी तितकेच सके मारले. ताणें हसना आड आक्रमक बॅटींग केली. सुरवातीच्या तीन ओव्हरींनी तीन चवके आनी एक सको मारून चेपण उणें केलें.
फिलिप्सान डॅरिल मिचेल (18) वांगडा सवे विकेटी खातीर 49 आनी कायल जॅमिसन (20) हाच्या वांगडा मेळून आठवे विकेटी खातीर 55 धांवड्यांची भागिदारी करून पंगडाक संकश्टांतल्यान भायर काडलो.
ऑफ स्पिनर मेहदी हसन आनी दावखुरो स्पिनर तैजुल इस्लाम हाणें दरेकी तीन विकेटी घेतल्यो. जाल्यार फास्ट बॉलर शोरफूल इस्लाम आनी ऑफ स्पिनर नईम हसन हाणें दरेकी दोन विकेटी घेतल्यो.
न्युझिलॅण्डाक दुसऱ्या डावांत दावखुरो स्पिनर एजाज पटेलान पयलेच ओव्हरींत महमुदूल हसनाक (2) बाद करून बरी सुरवात करून दिली.
मुखेली टिम सावथीन आठवे ओव्हरींत बांगलादेशाक दुसरो धपको दिलो. ताणें बांगलादेशाचो मुखेली नजमूल हसन शांटो (15) हाका बाद केलो. केन विलियम्सनान ताची कॅच धरली. हे ओव्हरी उपरांत उण्या उजवाडाक लागून तिसऱ्या दिसाचो खेळ थांबवचो पडलो.
दोन टॅस्टींचे माळेंतली पयली मॅच बांगलादेशान 150 धांवड्यांनी जिखिल्ली. बांगलादेशा कडेन न्युझिलॅण्डा आड पयले खेपे टॅस्ट माळ जिखून इतिहास घडोवपाची भांगराळी संद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
