भांगरभूंय | प्रतिनिधी
पाड्डेंच्या फादर आग्नेल व्हायएससीन केळशी व्हिलेजर्स युके करंड सर्त जिखली. फायनलींत ताणें फातोड्डेंच्या डॉन बॉस्को ऑरेटरीक एका गोलान हारयलो. केळशीच्या सांताक्रूझ क्लबान फादर ड्रस्टन आनी वॅलिंग्टन फुटबॉल मैदानाचेर सर्तीचें आयोजन केल्लें.
डॉन बॉस्को ऑरेटरीन मॅचीचेर चड वगत आपलो शेक दवरिल्लो. पूण, ताका गोल करपाक जमलो ना. पयल्या अर्दांत मिल्सन बार्रेटो, वॅल्टन डिसौझा हाणें गोल करपाच्यो संदी वगडायल्यो, दुसऱ्या अर्दांत हन्सलम फुर्तादो आनी क्लायव्ह मिरांडा हाणें मारिल्ले शॉट गोलपोस्टाच्या आडव्या खांब्याक आपटून भायर गेले. दुसरे वटेन फादर आग्नेल स्पोर्ट्स क्लबान मेळिल्ले संदीचो फायदो घेतलो. मॅचींतलो एकोडो आनी म्हत्वाचो गोल रिसन कोस्तान केलो.
ह्या जैतान फादर आग्नेलाक 60 हजार आनी करंड फावो जालो, जाल्यार डॉन बॉस्को ऑरेटरीक 40 हजार आनी करंडाचेर समाधान मानचें पडलें.
वैयक्तीक इनामां अशींः आल्फ्रेड नोरोन्हा (उत्कृश्ट डिफॅण्डर, डॉन बॉस्को ऑरेटरी), नॅल्सन फर्नांडीस (उत्कृश्ट मिडफिल्डर, फादर आग्नेल), प्रवेश बोरकार (उत्कृश्ट गोलकीपर, फादर आग्नेल), पेड्डें बूम स्पोर्ट्स क्लब, हणजूणें (शिस्तीचो क्लब), सॅमसन फर्नांडीस (गोल्डन बूट, आंबेली स्पोर्ट्स क्लब), रिसन कोस्ता (फायनलींतलो उत्कृश्ट खेळगडो, फादर आग्नेल).
इनामां भेटवण सुवाळ्याक केळशींचे सरपंच डिक्सन वाझ, फादर उबाल्डो फर्नांडीस, फादर सावदी परेरा, अंकिता देसाय आनी अॅंथनी पांगो हे उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
