भांगरभूंय | प्रतिनिधी
सध्या भुरग्यांक मुतखडो आनी कॅन्सर जावपाचें प्रमाण वाडलां. कॅन्सरा सारकिल्लें जिवाक धोको निर्माण
करपी दुयेंस वाडपा फाटलीं कारणां सोदून काडपाक हालींच संशोधन केलें. ह्या संशोधनाचो अहवाल हालींच ‘बीएमजे’त उजवाडाक आयला. भुरग्यां मदीं मुतखडो आनी कॅन्सराचें प्रमाण वाडपाक फास्ट फुड जापसालदार आसा, असो दावो संशोधकांनी केला. हो अहवाल भुरग्यां खातीर तशेंच पालकांक दोळे उगडपी आसा.
भलायकी आहार घटकांचेर आदारून आसता.
आहार शास्त्र म्हणटा, दिसपट्टो आहार चौरस आसचो. म्हळ्यार तातूंत कुडीक जाय आशिल्ले सगळे जीनस आसपावपाक जाय. पूण आयच्या व्यस्त काळांत लोकांक रांदपाक आनी खावपाक वेळ मेळना, देखून ते फास्ट फुडाचेर आदारून रावतात. भुरग्यां सावन व्हडल्यां मेरेन सगल्यांक फास्ट फूड खावपाक मना पसून आवडटा. खास करून शाळेंतल्या भुरग्यांक फास्ट फूड म्हणजे पंचपक्वान्नूय कशें दिसता. घरांत तयार केल्ली भाजी, चपाती खातना किरकिर करपी भुरगीं, पूण फास्ट फूड मात मिटक्यो मारीत खातात. देखूनच ह्या इंस्टंट आनी तोंडाक उदक हाडपी खाणांक ह्या दिसांनी चड मागणी आसा.
जिबेक आवडपी हीं खाणां भलायके खातीर बरीं नात. ह्या इंस्टंट फास्ट फूडांत साकर आनी मीठ चड प्रमाणांत आसता आनी तीं चड तळटात. ह्या चड प्रक्रिया केल्ल्या खाणांचो पोशण मोल नासता. देखून दोतोर आनी आहारतज्ञ लोकांक ह्या खाणां पासून पयस रावपाचो सल्लो दितात, पूण लोक तांचें कशेंच आयकनात. दोन वर्सां आदीं संवसारीक नामनेचे फास्ट फूड कंपनीन आपूण तयार करपी 60 टक्के खाणां- जेवण आनी थंड पेयां पोशक नात अशें मान्य केल्लें. ही कंपनी चॉकलेट, केक, पास्ता, केचप, वेफर अशीं वेगवेगळीं उत्पादनां तयार करता. खासा करून हीं खाणां भुरग्यां मदीं खूब लोकप्रीय आसात. आवय- बापूय भुरग्यांच्या हट्टाक लागून तांकां हीं खाणां दितात. ह्या खाणांक पोशण मोल ना अशें कंपनी मान्य करता तरी पालक फास्ट फूड सोडून दिनात.
कांय पदार्थांत कुडीक हानीकारक अशे घटक आसतात हें तज्ञांनी संशोधन करून सिद्ध केलां. फास्ट फूडांतल्यान कुडीक हानीकारक अशें सिद्ध जाल्ले घटक काडून उडयल्यात अशें कंपनीन मान्य केलां, पूण अजूनय हानीकारक घटक आशिल्लीं जायतीं खाणां आसात आनी तीं बाजारांत विकपाक आयल्यांत. संवसारांतल्या कांय नामनेच्या कंपनींचेर तांच्या उत्पादनांत हानीकारक घटक आशिल्ल्याचो आरोप आसा, तरी लेगीत ह्या कंपनींच्या फास्ट फूड उत्पादनांची लोकप्रियताय उणी जावंक ना, उरफाटी वाडत आसा. फास्ट फूडाक लागून भुरग्यांक जायत्या दुयेंसांक तोंड दिवचें पडटा. तें चड खाल्यार काळजाचे दुयेंस, गोडेंमूत आनी मोटसाण येवंक शकता. कॅन्सरा सारकिल्ले असाध्य रोग जावंक शकतात, देखून पालकांनी भुरग्यांक फास्ट फूडा पासून पयस दवरपाक जाय, हें आतां संशोधनांतल्यान सिद्ध जालां. फास्ट फूड खावचे बदला पालकांनी भुरग्यांक दूद, चपाती, पराठो, चटणी, दाळ, फोव, पावभाजी, उपमा अशे पोशक अन्न खावपाक दिवंक जाय. भुरग्यांक रुचीक अन्न दिवचे बदला पुश्टीक अन्न दिवप ही पालकांची जापसालदारकी.
भलायकेक घातक पुण्यां एके नामनेचे ऑटोमोबायल कंपनीक पुरवण केल्ल्या सामोशांत कंडोम, गुटखा आनी फातर सांपडिल्ल्याची घडणूक ताजी आसतनाच आतां झेलाचे लादयेंत मेल्लो हुंदीर सांपडिल्ल्याचो धक्को दिवपी प्रकार बेल्हे- जुन्नर (पुणें) हांगां उक्ताडार आयला. विशेश म्हणल्यार ह्यो झेलाच्यो लादयो सरबत, ज्यूस, झेलाचो गुळो करपी दुकानदारांक पुरवण जाताल्यो. मेल्ल्या हुंदराक लागून ऊसाचो रोस, झेलाचो गुळो, लिंबू सरबत, फळांचो ज्यूस बी पियेल्ल्यान लोकांक जो त्रास जातलो आशिल्लो ताका जापसालदार कोण? असो प्रस्न गंभीर प्रस्न उपस्थित जायत आसा.
ही घडणूक म्हणल्यार लोकांचे भलायके कडेन खेळपाचो प्रकार आसून हाका लागून लोकांची भलायकी घाताक आयल्या. हाचो अर्थ हें पयलेंच फावट जालां अशें न्हय. दर वर्सा गिमाच्या दिसांनी असो प्रकार उक्तडार येत आसता. पोरूं वर्सां लेगीत असोच प्रकार घडिल्लो. मुंबयंतल्या कुर्ला रेल्वे स्टेशनाच्या प्लॅटफॉर्मार घाणयारे पद्दतीन लिंबाचें सरबत तयार करतनाचो व्हिडिओ व्हायरल जाल्लो. त्या व्हिडिओंत लिंबू सरबत तयार करपा खातीर विक्रेते घाण उदकाचो वापर करतात तें सामकें स्पश्ट दिसतालें.
फाटल्या वर्साची घडणूक वा आतांची मेल्लो हुंदीर आशिल्ल्या झेलाचे लादयेची तशेंच सामोशाची घडणूक पळयत जाल्यार रस्त्यांचेर मेळपी खावपाचे पदार्थ वा पेय पदार्थांच्या दर्ज्याचेर कितलो विस्वास दवरप हो प्रस्न निर्माण जाला. शारांच्या रस्त्यांचेर लिंबू सरबत, झेलाचे रंगीत गुळे विकपी हातगाडयो उब्यो आसतात. गीम आशिल्ल्यान लोकूय ह्या हातगाड्यां वेलें सरबत वा झेलाचे गुळो विकतो घेवन खातात. ताका लागून भलायकेक तात्पुरती थाकाय जरी मेळत आसली तरी भलायकेक तें घातक आसता.
खदूळ उदक, दुशीत झेल हाका लागून लोकांची भलायकी घाताक आयल्या. झेल तयार करीत आशिल्ल्या कारखान्यांनी हलगर्जीपण वा जंय झेल सांठयतात थंय हुंदीर, घुशींचो राबितो आसूंक शकता. ताका लागून अशे प्रकार घडत आसतात. ते खातीर झेलाचे कारखाने आनी झेल सांठोवपाचे सुवातेची खरपणान तपासणी जावप गरजेची आसा.
भलायकी खातें तशेंच प्रशासनान झेलाचे कारखाने तशेंच रस्त्यार उबे आशिल्ल्या हातगाड्यांची तपासणी करप गरजेची आसा. थंयचे नितळसाणेची लेगीत बारकायेन तपासणी जावंक जाय. झेल, उदक हाचे सयत रस्त्यांचेर विकतल्या खाद्य पदार्थांची लेगीत खरपणान तपासणी जावंक जाय. रस्त्यांचेर उबे आशिल्ल्या गाड्यां वेले खाद्यपदार्थांच्या दर्जां विशीं प्रस्न उपस्थीत जायत आसता. ह्या खाद्य पदार्थांची लेगीत वेळावेळार तपासणी जावंक जाय. लोकांचे भलायके कडेन खेळप्यांक खर ख्यास्त जावंकूच जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
