भांगरभूंय | प्रतिनिधी
सायकलीं खातीर रस्तो सुरक्षा जागृताय आराखडो तयार करपाची मागणी
पणजी, प्रतिनिधी : एकवटीत राष्ट्रसंघान थाराव घेतल्या उपरांत फाल्यां 3 जुनाक संवसारभर सायकल दीस मनयतात. सायकल हें प्रवासाचें सवाय आनी सुरक्षीत साधन. गोंयांत सायकलस्वारां खातीर रस्तो सुरक्षा जागृताय आराखडो तयार करचो, अशी मागणी गोवा कॅन हे एनजीओन येरादारी खात्या कडेन केल्या.
गोवा कॅन संघटणेचे संघटक रोलँड मार्टिन्स हांणी येरादारी पुलीस अधीक्षकांक रस्तो सुरक्षा जागृताय आराखडो तयार करपाच्या मागणेचे पत्र बरयलां.
दोन शेकड्यां परस चड तेप येरादारी खातीर सायकलीचो वापर सुरू आसा. सायकलीक लागून प्रदुशण जायना. तशेंच इंधनाची गरज नाशिल्ल्यान हेर वाहनां परस सायकल चलोवप सगळ्यांक परवडटा. 12 एप्रील 2018 हे दिसा एकवटीत राष्ट्रसंघान 3 जून हो संवसारीक सायकल दीस मनोवपाचो थाराव घेतलो. हाचे उपरांत 3 जून हो संवसारीक सायकल दीस म्हूण मनयतात. हे फांटभुयेर गोंय कॅन संघटणेन येरादारी पुलीस अधीक्षकांक पत्र बरोवन तरेकवार मागण्यो केल्यात.
राज्यांन रस्तो सरक्षा वेवस्थापन समित्यो कार्यरत आसा. येरादारी खात्यान सायकलीं खातीर रस्तो सुरक्षा जागृताय आराखडो तयार करचो. राज्यांत सायकल चलोवप्यांचो आंकडो ल्हव ल्हव वाडत आसा. ही गजाल मतींत घेवन येरादारी खात्यान म्हामार्ग आनी हेर रस्त्यांचेर सायकलीं खातीर सुचोवणी फलक लावचे. रस्त्याचे रोड इंजीनिअरिंग करतना सायकलींचो विचार करपाचे आदेश भौशिक बांधकाम खात्याक दिवचे. दर वर्सा सप्टेंबरात रस्तो सुरक्षा सप्तकाचें आयोजन जाता. हे सप्तकात हे फुडें सायकल आनी सायकलस्वारांचो आसपाव करचो. फांटले 15 वर्सांत सायकलस्वारांचे अपघाती मरण आनी जखमींची म्हायती दिवची. अभ्यासा वेळार हे म्हायतेचो उपेग जातलो, अशें गोवा कॅनान येरादारी पुलीस अधीक्षकांक बरयल्ल्या पत्रांत म्हणला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
