भांगरभूंय | प्रतिनिधी
आयतारा हांगाच्या नरेंद्र मोदी स्टेडियमाचेर ऑस्ट्रेलिये आड जावपी संवसारीक वन डे क्रिकेट सर्तीचे फायनलींत भारत किताबाचो मुखेल दावेदार आसा. ते खातीर भारतान आपले रणनितीचेर कायम रावपाची गरज आसा. तशेंच फायनली खातीर येजमान पंगडान कांयच वेगळें करपाची गरज ना असो सल्लो लेगीत ताणें दिलो.
भारताचे सगले खेळगडे सुशेगाद आसतले. ते घरच्या मैदानाचेर खेळटात आनी हो पंगड खूब अणभवी आसा. तांकां कांयच वेगळें करपाची गरज ना अशें शास्त्रीन हांगा आयोजीत केल्ले एके कार्यावळींत उलयतना म्हणलें.
भारताक वस्तादपण जोडपाची भांगराळी संद आसा. किताबाचो मुखेल दावेदार म्हणून फायनलींत भारत सुरवात करतलो अशें ताणें मुखार म्हणलें.
लीग टप्प्यांत ऑस्ट्रेलिया पंगडाक हारोवपा खेरीत आयसीसी संवसारीक सर्तींत भारताचो ऑस्ट्रेलिये आड बरो रॅकॉर्ड आसा. तरी पूण, ऑस्ट्रलिये आड सादूर रावपाची ताका गरज आसा अशें कांय जाणकारांचें मत आसा. पूण, शास्त्री म्हणटा, भारतान धैर्यान खेळ केलो आनी चेपणाक योग्य रितीन हाताळपाक शकलो जाल्यार वस्तादपण जोडपा पसून ताका कोणूच आडावपाक शकना.
भारतान शांत, संयमा खेरीत चेपणाक योग्य रितीन हाडपाची गरज आसा. ही फायनल मॅच. ताका लागून भारतान चड अती उमेदीन रावपाक जायना. पंगडाक कितें करपाक जाय हें खबर आसा आनी म्हत्वाची गजाल म्हणल्यार हो पंगड फकत एक वा दोन खेळगड्यांचेर निंबून ना. दरेक मॅचींत नव्यानव्या खेळगड्यान बरें प्रदर्शन केलां. हो एक बरो संकेत आसा अशें शास्त्रीन मुखार म्हणलें.
फास्ट बॉलर मोहम्मद शमीची तोंड भरून तोखणाय केली. मोहम्मद शमीन हे सर्तींत अजून मेरेन 23 विकेटी घेवन विकेट घेवपाचे वळेरेंत पयले सुवातेर आसा. आयतारा जावपी फायनलींत शमी म्हत्वाची भुमिका वठयतलो अशें भारताचो आदलो अश्टतासांचो खेळगडो शास्त्रीन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
