भांगरभूंय | प्रतिनिधी
वास्को : चिखलेच्या सेंट फ्रांसिस झेवियर इगर्जेचे धर्मगुरू फादर बोलमॅक्स परेरा हांची भलायकी शेनवारा अकस्मात इबाडली. उपरांत तांकां रोखडेच उपचारा खातीर जीएमसींत व्हेले. सध्या तांची भलयाकी थीरआसा.
मेळिल्ले म्हायती प्रमाण, शेनवारा वास्को रेल्वे स्टेशनाचेर आसतना फादर बोलमॅक्स अकस्मात बेसुद पडले. ते उपरांत उपचारा खातीर तांकां जीएमसींत व्हेले. सध्या तांची भलायकी थीर आसा आनी वैजकी अधिकारी तांचेर उपचार करतात. बोलमॅक्स परेरा हांकां काळजाचो दुयेंस आशिल्लें आनी तांणी ताचेर उपचार केल्ले. तांचे भलायकी विशीं अजून चड म्हायती मेळूंक ना.
पॅरिश काउन्सिल आनी हेर असोसिएशनची भोंवडी कुळे वचपाची आशिल्ली. हाचे खातीर फादर बोलमॅक्स परेरा हेरां सयत वास्को रेल्वे स्टेशनाचेर गेल्ले तेन्ना तांकां अस्वस्थताय जाणवली आनी ते सकयल पडपाक लागले तेन्ना लागसारच्या तरणाट्यांनी तांकां धरले. फादर बोलमॅक्स हांकां काळजाचे दुयेंस आशिल्ल्यान रोखडेच हॉस्पिटलांत व्हेले आनी थंय वैजकी अधिकाऱ्यांनी तांची तपासणी केली. उपरांत तांकां फुडल्या उपचारा खातीर जीएमसींत धाडले. ईसीजी, सीटीस्कॅन, एक्सरे अशो सगळ्यो गरजेच्यो चांचण्यो केल्यो. तांची भलायकी आतां थीर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
