भांगरभूंय | प्रतिनिधी
फातोड्डें पुलिसांची कारवाय
मडगांव, प्रतिनिधी ः फातोड्डें पुलिसांनी वाठारांतल्या एका घरांत धाड घालून दुबावीत धीरज उर्फ डेव्हिड संजीत रॉड्रिगीस (26) हाका अटक केली. दुबाविता कडल्यान ड्रग्स आनी रोख रक्कम सयत 2.37 लाखांचो म्हाल जप्त केलो.
फतोड्डा पुलिसांनी अमली पदार्थां आड व्हड कारवाय केली. धीरज ह्या 26 वर्सां पिरायेच्या तरणाट्या कडेन वेगवेगळे प्रकारचे ड्रग्स आशिल्ल्याची म्हायती पुलिसांक मेळिल्ली. ते प्रमाण पुलिसांनी फातोड्ड्यांच्या सिटी कॅफे मुखार आशिल्ल्या धीरज हाच्या घराचेर धाड घाली. हे धाडी वेळार दुबाविता कडल्यान कोकेन, एमडीएमए, गांजो आनी वेगवेगळ्या प्रकारचे ड्रग्स सांपडले. हाचे भायर 29 हजार रोख रक्कमय जप्त केली. तशेंच दुबाविता कडल्यान 2 लाख 8 हजारांचें ड्रग्स जप्त केल्यांत.
दुबाविता कडल्यान 30 ग्राम हायड्रोफोनिक वीड, 258 ग्राम गांजो, 8.53 ग्राम 19 इक्टॅसी गुळयो, 0.94 ग्राम मेथाफेटामायन, 4.39 ग्राम एमडीएमए, 3.23 ग्राम कोकेन पावडर, हॅश ऑयल, 7 एलसीडी पेपर मेळून 2,08,035 रुपयांचे अमली पदार्थ जप्त केल्यात.
चवकशी उपरांत दुबावीत धीरज उर्फ डेव्हिड रॉड्रिग्ज हाका पुलिसांनी अटक केल्या. ह्या प्रकरणाचो फुडलो तपास पुलीस निरीक्षक नाथन आल्मेदा हांच्या फुडारपणा खाला उपनिरिक्षक अमीन नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
