भांगरभूंय | प्रतिनिधी
पणजी, बातमीदार ः उत्तर ते दक्षीण भारत मेरेन सगळेकडेन उश्णताय वाडला आनी गर्मी सोंसपाक जायना. देखून उत्तर प्रदेश, बिहार, झारखंड, अस्तंत बंगाल, ओडिशा, कर्नाटक, तमिळनाडू, केरळ, आंध्र प्रदेश आनी तेलंगणा उश्णतायेची शिटकावणी दिल्या. तीन दिसांनी ह्या राज्यांनी खर उश्णताय ल्हार येतली अशी शिटकावणी भारत हवामान खात्यान आयज दिल्या. जाल्यार फाटल्या 24 वरांत गोंयांत चडांत चड तापमान 33 ते 35 अंशां मदीं नोंद जालां. फुडले सात दीस गोंयांतलो पारो असोच उरतलो असोय अदमास आसा.
उश्णताय ल्हारांची शिटकावणी आशिल्ल्या राज्यांनी 42 अंशां वयर तापमान नोंद जालां. हाचे भायर महाराष्ट्र, मध्य प्रदेश आनी छत्तीसगढ हांगाय तापमान 42 अंश नोंद जालां. दुसरे वटेन ओडिशा आनी अस्तंत बंगालांत तापमान 45 अंश मेरेन पावपाची शक्यताय आसा. आयतारा सगळ्यांत चड तापमान (45.2 अंश) आंध्र प्रदेशांतल्या नंदयाल हांगा नोंद जालां.
उश्णताय ल्हार केन्ना येता?
हवामान खात्याच्या म्हणण्या प्रमाण मैदानी वाठारांत तापमान 40 अंश, दर्यादेगेवेल्या वाठारांनी 37 अंश आनी दोंगराळ वाठारांनी 30 अंश पावतकच उश्णताय ल्हार येता. तापमान सामान्या परस 4.5 अंश सेल्सियस वाडल्यार उश्णताय ल्हार येता आनी तापमान 6.4 अंश सेल्सियस वाडल्यार खर उश्णताय ल्हार येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
