भांगरभूंय | प्रतिनिधी
खलाशांच्या कुटुंबांक सादूर रावपाचो बोट महासंचालकांचो उलो
मडगांव, प्रतिनिधी ः बोटींचेर काम करपी खलाश्यांच्या कुटुंबांक फटीचे फोन करून खून, बलात्कार, स्मगलिंग ह्या गंभीर गुन्यांवांनी खलाशी आडकला अशी फटीची म्हायती दिवन तांच्या सुटके खातीर पयशे धाडपाक सांगतात. अशे कॉल, ईमेल आयल्यार जतनाय घेयात. संबंदीत बोटीचेर वा नोकरीच्या सुवातेर आशिल्ल्या अधिकाऱ्यांक कळोवचें. अशा फटवणुकीं पसून खबरदारी घेवची असो उलो बोट येरादारी महासंचालकानी मारला.
नागरिकांची अर्थीक फटोवणूक करपाचे वेगवेगळे प्रकार आसात. हातूंत आतां खलाशींच्या कुटुंबांक लक्ष्य करपाक लागल्यात. जहाज येरादारी महासंचालकान जारी केल्ल्या सुचोवण्यां प्रमाण खलाशांच्या कुटुंबां कडेन व्हॉट्सअॅप, ईमेल आनी टेलिकॉल वरवीं संपर्क करतात आनी कस्टम, पुलीस, सीबीआय वा तत्सम तपास एजन्सी कडल्यान उलयतात अशें सांगतात. हाचे भायर बोटीचेर काम करपी खलाशी खून, तस्करी, बलात्कार, ड्रग्स अशा गंभीर गुन्यांवांनी आडकला अशें सांगतात. ताचे सुटके खातीर कांय प्रमाणांत पयशांची मागणी करतात. अशा प्रकरणांत कांय जाणांनी पयशे दिल्ल्याचेय कळ्ळां. बोटींतल्या खलाश्यांच्या कुटुंबांनी अशे कॉल, ई-मेल वा संदेश आयल्यार काम करतात त्या सुवातेर वा बोटीच्या वरिश्ठांक कळोवचे. ते उपरांत योग्य कारवाय करतले अशें बोट येरादारी महासंचालकान सांगला. गोंयचे जायते खलाशी बोटीचेर काम करतात. देखून गोंयांतल्या खलाशांच्या कुटुंबांक सादूर रावचें असो उलो तांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
