भांगरभूंय | प्रतिनिधी
बेगीनूच दितले कार्ड
पणजी: थळाव्या नुस्तेंमार्यांचें हीत जपपा खातीर सरकार विवीध यत्न करता. बेगीनूच नुस्त्या उद्देग खात्या वतीन राज्यांतल्या परंपरीक नुस्तेंमार्यांक, विक्रेत्यांक कार्ड दितले. फकत असलें कार्ड आसप्यांकूच राज्यांत नुस्तें विकपाक मेळटलें अशी घोशणा मुख्यमंत्री डॉ. प्रमोद सावंत हांणी केली. बिरेस्तारा पणजी राष्ट्रीय नुस्तें शेतकरी दिसा निमतान आयोजीत कार्यावळीत ते उलयताले. ह्या वेळार मंत्री नीळकंठ हळर्णकार, संचालिका शमिला मॉंतेरो, सचीव प्रसन्न आचार्य आनी हेर अधिकारी हाजीर आशिल्ले.
मुख्यमंत्र्यानी म्हणलें, सध्या राज्यांत नुस्तें उद्देग सोडल्यार हेर सगळे वेवसाय हेर राज्यांतल्या लोकांच्या हातांत गेल्यात. नुस्त्याचो उद्देग थळाव्यांच्या हातांत उरप गरजेचें. हाका लागूनच थळाव्या नुस्तेंमार्यांक कार्ड दितले. गोंयांत पंदरा वर्सां रावपी आनी नुस्तें उद्देगांत येतले. गोंयांत पंदरा वर्सां रावपी आनी नुस्त्याच्या उद्देगांत आसपी मनशांक अशें कार्ड दितले. थळाव्या नुस्तेंमार्यांकूय नुस्तेंमारी वेवसायांत हेर राज्यांतल्या लोकांक प्रवेश करून दिवचो न्हय. नुस्तें कापपाचें, धुवपाचेंय काम थळाव्यांक दिवचें.
नुस्त्याचो उद्देग आपल्याच हातांत उरचो म्हूण थळाव्यांनीय यत्न करप गरजेचें. थळाव्या नुस्तें विक्रेत्यांनी आपलो जागो हेर राज्यांतल्या मनशांक चलोवपाक दिवचो न्हय. वा आपल्या नुस्तेंमार कार्डार हेर कोणाक विक्रेची परवानगी दिवची न्हय. ह्या वेवसायांत खूब पयसो आसा. हें समजले उपरांत हेर राज्यांतले लोक ह्याय वेवसायांत येवपाक पळयतले. आयज नुस्तें करपी हेर राज्यांतले लोक कांय दिसांनी नुस्तेंय विकतले. हाका लागून थळाव्यांनी सादूर रावपाक जाय.
रस्त्या कुशीक विक्री करप्याचेर कारवाय
मुख्यमंत्र्यान म्हणलें, नुस्त्याची विक्री फकत थारावन दिल्ल्या जाग्यारूच जावंक जाय. रस्त्या कुशीक बसून नुस्तें विकतल्यांचेर खर कारवाय करतले. गोंयकारांनीय फकत बाजारांतल्यानूच नुस्तें विकत घेवचें. कार्ड नासतना नुस्तें विक्री करप्यांचेर कारवाय जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
