भांगरभूंय | प्रतिनिधी
रमाकांत खलप २५ वर्सां उपरांत कॉंग्रेस पक्षाचे उत्तर गोंयचे उमेदवार
पणजी : राज्याचे पयले अल्पसंख्यांक मुख्यमंत्री जावपाचो मान मेळोवपी चर्चील आलेमांव हे एक राजकारणांतलें अजाप जावन आसात. आपले राजकी कारकिर्दींत तांणी खुबशे पक्ष बदल्ल्यात. कॉंग्रेस, युगोडेपा, सेव्ह गोवा फ्रन्ट, राष्ट्रवादी कॉंग्रेस ह्या पक्षांचे उमेदवारीचेर तांणी विधानसभा वेंचणूक जिखल्या. तशेंच युगोडेपा (१९९६) आनी कॉंग्रेस (२००४) ह्या पक्षां वतीन तांणी लोकसभा वेंचणूकय जिखल्या. २०१४ वर्सा तांणी तृणमुल कॉंग्रेसी वतीन दक्षीण गोंयच्यान लोकसभा वेंचणूक लढयल्ली. मात ते हारिल्ले.
अमृत कांसार, प्रा. गोपाळराव मयेंकार, रमाकांत खलप, पांडुरंग राऊत हांणी दोन पक्षां वतीन लोकसभा वेंचणूक लढयल्या. मात हाचे मदल्या कोणेंच दोनूय पक्षांचे उमेदवारीचेर जैत जावंक ना. चर्चील आलेमांव हे १९९६ चे लोकसभा वेंचणुकेंत युगोडेपा वतीन, जाल्यार २००४ चे लोकसभा वेंचणुकेंत कॉंग्रेस पक्षा वतीन दक्षीण गोंयच्यान जैतिवंक जाल्ले.
अमृत कांसार हे १९७७ वर्सा मगो पक्षा वतीन उत्तर गोंयच्यान जैतिवंक जाल्ले. उपरांत १९९६ वर्सा कॉंग्रेस पक्षा वतीन तांणी लोकसभा वेंचणूक लढयल्ली. मात हे खेपो तांकां अपेस आयलें. गोपाळराव मयेंकार हांणी १९७७ वर्सा राजापुर (महाराष्ट्र) मतदारसंघांतल्यान कॉंग्रेसी वतीन लोकसभा वेंचणूक लढयल्ली. प्रा. मधू दंडवते हांणी तांकां हारयिल्ले. उपरांत १९८९ आनी १९९१ वर्सा उत्तर गोंयच्यान मगो पक्षा वतीन लोकसभा वेंचणूक लढयल्ली. १९८९ वर्सा जैतिवंत जावन ते मगोचे खासदार जाले आनी उपरांत १९९१ चे वेंचणुकेंत मगोचे उमेदवार आसतनाच ते हारले.
पांडुरंग राऊत हांणी १९९८ वर्सा भाजपा आनी २००९ वर्सा मगो वतीन लोकसभा वेंचणूक लढयल्ली. दोनूय फावटीं ते हारले.
सध्याचे उत्तर गोंयचे कॉंग्रेस उमेदवार रमाकांत खलप हांणी १९९६ आनी १९९८ ची लोकसभा वेंचणूक मगो पक्षा वतीन लढयल्ली. १९९६ वर्सा ते जैतिवंत जाले आनी १९९८ वर्सा हारले. उपरांत १९९९ वर्सा लोकसभा वेंचणूक तांणी कॉंग्रेसी वतीन लढयल्ली. तेन्ना तांकां अपेसाक तोंड दिवचें पडलें. आतां २५ वर्सां उपरांत परत ते कॉंग्रेस पक्षाचे उत्तर गोंयचे उमेदवार आसात. जैतिवंत जाल्यार चर्चील हांचे वरीं दोन पक्षां वतीन लोकसभा वेंचणुकेंत जैतिवंत जावपाचो मान तांकां मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
