भांगरभूंय | प्रतिनिधी
न्हंयेच्या पात्रांतलो व्हड प्रमाणांत कोयर केलो एकठांय; लोकांचो उत्स्फूर्त प्रतिसाद
वाळपयः व्हाळवाट न्हंयेंत व्हड प्रमाणांत सांचिल्लो प्लास्टीक कोयर एकठांय करपाचे मोहिमेक लोकांचो बरो प्रतिसाद मेळ्ळो. विवेकानंद पर्यावरण जागृती मंच आनी केरी पंचायत जैवविविधता समिती हांच्या जोडपालवान व्हाळवाट प्लास्टीक मुक्त मोहीम हातांत घेतिल्ली. तातूंत गोंयच्या वेगवेगळ्या वाठारांतल्यान आयिल्ल्या लोकांनी वांटो घेतलो.
व्हाळवाट न्हंयेचे धडेर व्हड प्रमाणांत प्लास्टीक कोयर सांचिल्लो. पावसाळ्यांत पावसाच्या उदका वांगडा तो न्हंयेच्या पात्रांत वचून ताचो जैवविविधतायेचेर परिणाम जावपाची शक्यताय आशिल्ली. हाची विशेश दखल घेवन पर्यावरण मळाचेर म्हत्वाचें योगदान दिवपी विवेकानंद पर्यावरण जागृती मंच केरी आनी केरी पंचायत जैवविविधता समिती हांणी आयतारा 4 जूनाक एका दिसाची व्हाळवाट प्लास्टीक मुक्त मोहीम हातांत घेतली. हे मोहिमेंत केरीची सरपंच दीक्षा गांवस, पंच उस्मान सय्यद आनी हेरांनी वांटो घेतलो.
हे संबंदांत व्हड प्रमाणांत जनजागृती केल्ल्यान आयतारा सकाळच्यानूच लोकांनी हे मोहिमेक बरो प्रतिसाद दिलो. मोहिमेची सुरवात उबो गुणो वाठारांतल्यान केली. हे न्हंयेच्या पात्रांत आनी धडेर आशिल्लो प्लास्टीक आनी हेर कोयर एकठांय करून तो पोतयांनी भरलो. ताचो विलो लावचे खातीर तो कोयर प्रकल्पांत धाडटले.
हे मोहिमेंत वांटेकार जाल्ले पर्यावरण जागृती मंचाचे कार्यकर्ते विठ्ठल शेळके हांणी प्रतिक्रिया दितना सांगलें, व्हाळवाट न्हंयेच्या पात्रांत कोयर उडोवचो न्हय, हाची जाणीव दरेकल्याक जावप गरजेचें आसा. व्हाळवाट न्हंय प्रदुशण मुक्त उरप सगळ्यां खातीर म्हत्वाचें आसा. कारण ही न्हंय प्रदुशीत जाली जाल्यार ताचे वायट परिणाम दरेकल्याचे भलायकेचेर जावपाची शक्यताय आसा. कारण हे न्हंयेच्या उदकाचो वापर पडोसे प्रकल्प आनी सांखळी उदक शुद्धीकरण प्रकल्पांत करतात. ह्याच उदकाचो वापर खावपा जेवपांत करतात.
हे मोहिमेचे निमंत्रक दशरथ मोरजकार हांणी हे संबंदांत अदीक म्हायती दितना सांगलें, नितळसाण मोहिमेचें आयोजन नियोजन पद्दतीन केल्लें. हाका बरो प्रतिसाद मेळ्ळो. चड करून भुरग्यां मदीं हे संबंदांत बरे तरेन जागृताय जाल्ल्यान तांणीय हे मोहिमेंत उत्स्फूर्तपणान वाटो घेतलो. भुरग्यां मदीं पर्यावरणाचो सांबाळ करपाची भावना रुजोवप खूब म्हत्वाचें आसा. हे मोहिमेचें आयोजन ताचोच एक भाग आशिल्लो.
सरपंच दीक्षा गांवस हांणी सांगलें, व्हाळवाट हो ह्या वाठारांतल्या लोकांचो स्वास. ह्या स्वासांत प्लास्टीक प्रदुशण मिश्रीत जालें जाल्यार फुडारांत ताचो वायट परिणाम लोकांचे भलायकेचेर जावपाक शकता, तशेंच व्हाळवाट न्हंयची जैवविविधतेक धोको उप्रासूं येता. हेच खातीर अशे तरेची मोहीम हातांत घेतिल्ली. विवेकानंद पर्यावरण जागृती मंच हे संस्थेन ह्या वावरांत फुडाकार घेवन ही मोहीम पंचायतीच्या आदारान चलयली. हे मोहिमेक लोकांनी बरो प्रतिसाद दिल्ले खातीर दीक्षा परब हांणी तांकां परबीं दिलीं आनी तांचे उपकार मानले.
व्हाळवाट न्हंयेचें संवर्धन करुंयाः दीक्षा गांवस
केरी पंचायत वाठारांत मेकळे सुवातेचेर कोयर उडोवचो न्हय, अशी खूब खेपे विनवणी केल्या. तरी लेगीत कांय लोक आयकनात, अशें दिसून आयलां. गोंय- बेळगाव म्हामार्गा कुशीच्यान व्हाळवाट न्हंयेचें पात्र व्हांवता. हाका लागून ह्या मार्गा वयल्यान प्रवास करपी प्रवासी खाद्यपदार्थ, प्लास्टीक पोतयो आनी हेर तरेचो कोयर व्हाळवाट न्हंयेच्या पात्रांत उडयतात. ताका लागून उदक प्रदुशीत जाता आनी जैवविविधतेक धोको उप्रासता. फुडारांत व्हाळवाट न्हंयेचें संवर्धन करपाक आमी अपेशी थारले जाल्यार ताचे गंभीर परिणाम पर्यावरणाचेर जातले, अशें सरपंच दीक्षा गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
