भांगरभूंय | प्रतिनिधी
पणजी: प्रादेशीक भाशांनी तुमचें अभिव्यक्ती सांगपी अशीं खूबशीं उतरां आसात. जीं तुमकां जाणीव करून दितात, तुमचें मूळ सांगतात. ह्यो भाशा तुमचे भितर आसतात. त्यो तुमच्या अणभवां कडेन जोडिल्ल्यो आसतात. ते खातीर प्रादेशीक भाशा सोंपूंक दिवं नाकात अशें गीतकार प्रसून जोशी हांणी सांगलें.
गीतरचने विशीं आयोजीत मास्टर क्लासांत ते उलयताले. एखादें गीत बरोवपा खातीर तुमी तुमचे भितरलो आवाज वळखप खूब गरजेचो आसता. तुमी खंयच्या वातावरणांतल्यान आयल्यात, हाचेर तुमी कशे व्यक्त जातात हें थारता. तुमच्या मनाचेर ताचो प्रभाव आसता जो तुमच्या व्यक्तीमत्वांतल्यानूय दिसत आसता अशें तांणी म्हणलें.
म्हज्या कुटुंबांत कोणूच ह्या मळार नाशिल्लो. हांवें स्वताच्या बळग्यार ह्या मळार आयलो. खूब काम केलें. हांव न्हंयेच्या उदकाचो मार घेवन गुळगुळीत जाल्ल्या फातरा सारको आसा. खंयच्या कारखान्यांत तयार जाल्लो ना. ताका लागून खूब पक्को जालां. कांय गजाली हेतुपुरस्सर करतां. सेस्नॉर मंडळांत वचत सावन सिनेमा, गीतां उण्यो बरयतां. तत्वां सांबाळपाक सदांच प्राधान्य दिता अशें तांणी म्हणलें.
एखादें गीत बरयता आसतना तुमी तुमच्या प्रेक्षकां कडेन जोडूंक जाय. दरेक गीताच्या माध्यमांतल्यान तुमी तांकां नव्या उतरांची वळख करून दिवंक जाय. हातूंतल्यान तांच्या ज्ञानातूय भर पडटा अशें जोशी हांणी म्हणलें.
तुमी जे करतात ते प्रेक्षकांचो आदर दवरून करूंक जाय. तांचे कडल्यान येवपी पयशांचो आदर करूंक जाय. हांव लोकगीतां आयकून व्हड जालों. ताका लागून म्हजेर प्रादेशीक भाशेचो प्रभाव आसा जो म्हज्या गीतांतल्यान तुमकां दिसून येता अशें तांणी म्हणलें.
पुराय सत्रांत तांणी तांच्यो कविता आनी पदां म्हणून दाखयलीं. पत्रकार अनंत विजय हांणी तांचे कडेन संवाद सादलो.
मस्सकली हें उतरूच ना
केन्ना केन्ना तुमकां जी धून मेळटा ताचेर तुमकां उतरां बरोवपाची आसतात. हांवें अशी खूबशीं पदां बरयल्यांत. तातूंतलेच एक मस्सकली हें गीत. पूण ह्या आशयाच्या अर्थाचें कसलेंच उतर ना. पूण लोकांक तें आवडलें. तें पदूय गाजलें. अशी सगली गंमत आसता असो एक खीण सांगतना प्रसून जोशी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
