भांगरभूंय | प्रतिनिधी
खात्या संबंदी आशिल्ल्या प्रस्नाच्या जापेकूच जाता कळाव : सभापती
पणजी, प्रतिनिधी : अधिवेशनांत प्रस्नांच्यो जापो 48 वरां पयलीं मेळपाक जाय. जापो उसरा मेळिल्ल्यान अभ्यास करपाक मेळना, अशी समस्या विरोधी पक्ष फुडारी युरी आलेमाव हांणी कामकाज सल्लागार समितीचे बसकेंत मांडली. प्रस्नाच्यो जापो आमदारांक आदले दिसाच मेळटात. कांय प्रस्न तरेकवार खात्या संबंदीचे आसतात, हाका लागून जाप दिवपाक कळाव जाता, अशें स्पश्टीकरण सभापती रमेश तवडकार हांणी बसके उपरांत दिलें.
विधानसभेचे पावसाळी अधिवेशन 15 जुलया सावन सुरू जाता. अधिवेशनाचें कामकाज थारोवपा खातीर कामकाज सल्लागार समितीची आयज बसका जाली. सभापती रमेश तवडकार, मुख्यमंत्री डॉ. प्रमोद सावंत, आमदार विजय सरदेसाय, आमदार वेंझी व्हिएगस, विरोधी पक्ष फुडारी युरी आलेमाव बसकेक हाजीर आशिल्ले.
पयली भशेन सगळ्यां पक्षांच्या आमदारांक उलोवपाची संद मेळटली. अधिवेशनांत येवपी सरकारी विधेयकां आजून निश्चित जावपाची आसा. अधिवेशन 18 दिसांचे आसतले. हाका लागून प्रस्न मांडपाक आमदारांक संद मेळटली. प्रतापसिंह राणे सभापती आसतना कामकाज सांजे 7 वरांचेर सोंपतालें. आतां तें उसरां मेरेन चलता, अशें तवडकार हांणी सांगलें.
विरोधी आमदारांक उलोवपाची संद मेळपा सयत जापेंत 5 वर्सां परस चड वर्सांची म्हायती दिवपाक जाय, अशी मागणी युरी आलेमाव हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
