प्रस्नमंजुशा सर्तींत कुडचडेंचें द न्यु एज्युकेशनल इंस्टिट्यूट जैतिवंत

प्रस्नमंजुशा सर्तींत जैतिवंत थारिल्ल्या कुडचडेंचें द न्यु एज्युकेशनल इंस्टिट्यूटाच्या पंगडा वांगडा चेतन आचार्य, अन्वेषा सिंगबाळ, अनंत अग्नी, अनुप मडकयकार, ब्रिजेश देसाय आनी हेर.

भांगरभूंय | प्रतिनिधी

राज्यांतल्या 45 विद्यालयांतल्यान 117 पंगड वांटेकार

मडगांव: मडगांवच्या कोंकणी भाशा मंडळ संचालीत रवीन्द्र केळेकार ज्ञानमंदिरान जनमत कौल दिसा निमतान आयोजीत केल्ल्या राज्य पावंड्यावेल्या ‘गोवन मास्टरमांयड’ हे प्रस्न मंजुशा सर्तींत कुडचडेंचें द न्यु एज्युकेशनल इन्स्टिट्यूट विद्यालय जैतिवंत थारलें.

सर्तीची मुळावी फेरी ऑनलान पद्धतीन जाली. हे फेरयेंत गोंयांतल्या 45 विद्यालयांतल्या 117 पंगडांनी वांटो घेतलो. तातूंतल्या पयल्या पंदरा क्रमांकांवेल्या संघांची निमाणे फेरये खातीर नेमणूक जाली. हातूंत राजमाता पद्मावती राजे सौंदेकार विद्यालय, बांदोडा, द न्यु एज्युकेशनल इन्स्टिट्यूट, कुडचडें, पर्पेच्युयल सुकोर कॉन्वेंट हायस्कूल, नावेली, महिला आनी नुतन हायस्कूल, मडगांव, चब्बी चिक्स स्प्रींग व्हॅली हायस्कूल, पिळर्ण, लॉयला हायस्कूल, मडगांव, भाटीकार हायस्कूल, मडगांव, सर्वोदय हायस्कूल, कुडचडें, सेंट जॉसेफ एज्युकेशनल इन्स्टिट्यूट, चांदोर, डॉ. के. बी. हेडगेवार हायस्कूल, कुजिरा हीं विद्यालयां निमाणे फेरये खातीर पात्र थारलीं. 

सर्तींतलो दुसरो क्रमांक कुजीराच्या डॉ. के. बी. हेडगेवार हायस्कुलाक जाल्यार तिसरो आनी चवथो क्रमांक लॉयला हायस्कूल, मडगांव, पांचवें इनाम चब्बी चिक्स स्प्रींग व्हॅली हायस्कूल, पिलर्ण, जाल्यार सवो क्रमांक महिला आनी नुतन हायस्कूल, मडगांव हांकां फावो जालो.

निमणे फेरयेचें उक्तावण अखील भारतीय कोंकणी परिशदेचे कार्याध्यक्ष चेतन आचार्य हांचे हस्तुकीं जालें. ह्या वेळार कोंकणी भाशा मंडळाची अध्यक्ष अन्वेषा सिंगबाळ, रवीन्द्र केळेकार ज्ञानमंदिरचे मुख्याध्यापक अनंत अग्नी, पालक शिक्षक संघाचे अध्यक्ष अनुप मडकयकार तशेंच सर्तीचे संयोजक ब्रिजेश देसाय हाजीर आशिल्ले. कोंकणी भाशा मंडळाचे आदले अध्यक्ष प्रशांत नायक हांचे हस्तुकीं इनामां भेटयलीं.